Shriram Mandir : निपाणीतील श्रीराम मंदिर उडवून देण्याची धमकी; दोन निनावी पत्रांनी खळबळ, मंदिरात कडेकोट पोलिस बंदोबस्त

निपाणी : येथील जुन्या पी. बी. रोडवरील श्रीराम मंदिर (Shri Ram Temple) उडवून देणाऱ्या धमकीचे निनावी पत्र मंदिरात मिळाले आहे. याबाबत निपाणी शहर पोलिस ठाण्यात (Nipani City Police Station) फिर्याद नोंद केली असल्याची माहिती ट्रस्टचे अध्यक्ष आनंद सोलापूरकर (Anand Solapurkar) यांनी दिली आहे.

त्यानुसार चिक्कोडीचे पोलिस (Chikkodi Police) उपाधीक्षक गोपाळकृष्ण गौडर, निपाणीचे मंडल पोलिस निरीक्षक बी. एस. तळवार व सहकाऱ्यांनी शनिवारी (ता. ९) सायंकाळी राम मंदिराला भेट दिली. नागरिकांनी घाबरून न जाण्याचे आवाहन त्यांनी केले.

शतकोत्तर परंपरा असलेल्या निपाणीतील श्रीराम मंदिरात २२ जानेवारी रोजी अयोध्या येथील रामलल्ला मूर्ती प्रतिष्ठापनेनिमित्त विविध कार्यक्रमांचे आयोजन करण्यात आले होते. तसेच श्रीराम सेना हिंदुस्तानतर्फे शहरातून शोभायात्रा काढण्यात आली होती. त्यानंतर मंदिराच्या गाभाऱ्याजवळ निनावी पत्र आढळून आले. त्यानंतर हनुमान मंदिराजवळ दुसरे पत्र आढळून आले आहे.

श्रीराम मंदिर ट्रस्टने दोन्हीही पत्रे निपाणी शहर पोलिस ठाण्याच्या उपनिरीक्षक उमादेवी यांच्याकडे सुपूर्द केली आहेत. पोलिसांच्या सूचनेनुसार राम मंदिर परिसरात सीसीटीव्ही लावण्यात आल्या आहेत.