भारत बंदला कोल्हापुरात अत्यल्प प्रतिसाद

कोल्हापूर : इंधन दरवाढ विरोधासह केंद्रीय तीन कृषी कायदे, वीज विधेयक, चार कामगार संहिता रद्द करण्यासाठी आज देशव्यापी बंदमध्ये कोल्हापूरात अत्यल्प प्रतिसाद मिळाला. जिल्ह्याचे पालकमंत्री सतेज पाटील यांच्यासह पदाधिकाऱ्यांनी भारत बंद मध्ये कॉंग्रेस पक्ष सहभागी असल्याचे सांगून कॉंग्रेस भवनमध्ये उपोषण सुरू केले. तर अखिल भारतीय किसान संघर्ष समन्वय समिती, संयुक्त कामगार संघटना समन्वय समितीने निवासी उपजिल्हाधिकारी भाऊ गलांडे यांना मागण्यांचे निवेदन दिले. 

अखिल भारतीय किसान सभा व शेतकरी संघटनांनी आज भारत बंदची हाक दिली होती. त्याला शहरासह जिल्ह्यात अत्यल्प प्रतिसाद मिळाला. शहरातील मुख्य बाजारपेठ असलेला महाद्वार रोड, धान्याबाजारासह इतर ठिकाणीही बंदची कोणतीही स्थिती दिसत नव्हती. भारतीय कम्युनिस्ट पक्ष, शेतकरी कामगार पक्ष, मार्क्‍सवादी कम्युनिस्ट पक्ष, जनता दल यांच्यासह भारतीय जनता पक्ष वगळता सर्वपक्षीय पदाधिकारी कार्यकर्ते बिंदू चौकात जमले. तेथून जिल्हाधिकारी कार्यालयात पोचले. शिष्टमंडळाने मागण्यांचे निवेदन दिले. केंद्रीय तीन कृषी कायदे, वीज विधेयक आणि चार कामगार संहिता रद्द करण्याविषयीची मागणी त्यांनी केली. 

हेही वाचा - पंधरा दिवस आधीच आंबा निर्यातीला सुरवात; कतार, इंग्लडला निघाला हापूस

केंद्र सरकारने लोकशाही पद्धती पायदळी तुडवत देशातील शेती आणि श्रमिकांचे जीवन उध्वस्त करणारे कायद्यांना जनतेचा विरोध डावलून माथ्यावर मारण्याचा सपाटा लावला आहे. त्याला शेतकरी, शेतमजुर आणि संघटीत असंघटीत कामगारांचा तीव्र विरोध असल्याचे सांगितले. तसेच पेट्रोल, डिझेल आणि घरगुती गॅसच्या किंमती सरकार कराचे आझे लादत असल्याने सामान्य जनतेच्या आवक्‍याबाहेर गेल्या आहेत. सरकारने अवाजवी कर रद्द करून इंधनाचे दर त्वरीत कमी करण्याची मागणी निवेदनाद्वारे केली. 

शिष्टमंडळात अखिल भारतीय किसान सभेचे उदय नारकर, राज्य किसान सभेचे नामदेव गावडे, जनता दलाचे वसंतराव पाटील, आयटकचे एस.बी.पाटील, सीटूचे प्रा. सुभाष जाधव, जनता दलाचे रवींद्र जाधव, भाकपचे सतीशचंद्र कांबळे, माकपचे शंकर काटाळे, सर्व श्रमीक संघाचे अनंतराव कुलकर्णी, शेकापचे बाबुराव कदम, बाबा मिठारी, दिलदार मुजावर, शिवाजी माळी यांचा समावेश होता.