एसटी इलेक्ट्रॉनिक्स तिकीट मशिन ठरतेय डोकेदुखी

कोल्हापूर : एसटी महामंडळाने वाहकांना इलेक्ट्रॉनिक्स तिकीट मशिन पुरवली आहेत. त्यांतील निम्म्याहून अधिक मशिन सदोष असल्याने वाहकांना मनस्ताप सोसावा लागत आहे. गेल्या दहा वर्षांपासून एकाच कंपनीला ४०० कोटींचा ठेका दिला व त्याच कंपनीला मुदतवाढ दिली. हा ठेका सहजासहजी अन्य कंपनीकडे जाणार नाही, याची काळजी काही अधिकाऱ्यांनी घेतली असल्याची चर्चा आहे. यातून सदोष मशिन वापरावी लागत असल्याने एसटी वाहकांकडून नाराजी व्यक्त होत आहे. एसटी संघटना राज्यव्यापी आंदोलनाच्या तयारीत आहेत.

एसटी महामंडळ १८ हजार गाड्यांतून रोज ४० लाख प्रवाशांची प्रवासी वाहतूक करते. त्यांतून राज्यातील ८ ते १० कोटींचा महसूल मिळतो. त्यातून प्रवाशांना चांगली सेवा देण्याची जबाबदारी महामंडळाची आहे.

इलेक्ट्रॉनिक्स तिकीट मशिनचा ठेका दादरमधील ट्रायमॅक्स कंपनीला देण्यात आला. त्यांनी राज्यभरात ६० ते ७० हजार मशिन दिली. यामध्ये विशिष्‍ट सॉफ्टवेअर बसवले आहे. यातून कागदी तिकिटे बाहेर येतात. किती प्रवाशांना तिकिटे दिली, एकूण किती पैसे जमा झाले, तारीख, वार, वेळ या नोंदणीसह सर्व हिशेब एसटी महामंडळकडे जमा होतो. प्रवाशांना झटपट तिकिटे मिळतात. असे हे मशिन वाहकांसाठी जरूर वरदान ठरले; मात्र कालांतराने मशिन बंद पडणे, बटणे खराब होणे, छापील रक्कम फुसट होणे, कागदी रिळ अडकणे अशा अनेक तक्रारी येऊ लागल्या. अशा तक्रारी दहा वर्षांपासून आहेत.

दर चार वर्षाला ठेका बदलणे अपेक्षित असताना त्याच कंपनीलाच तीन वेळा मुदतवाढ दिली. त्यासाठी जवळपास ४०० कोटींचा खर्च झाला. एवढे होऊनही मशिनची सेवा चांगली मिळत नाही. एसटीचे नुकसान होते. तरीही कंपनीवर कारवाई झालेली नाही. अन्य कंपन्या अशा प्रकारच्या मशिनचा पुरवठा करू शकतात; मात्र त्यांना कंत्राट देण्यात तांत्रिक अडचणी उभ्या करून एसटीने डावलले आहे.

इलेक्ट्रॉनिक्स तिकीट मशिनबाबत अनेक वेळा तक्रारी करूनही एसटी महामंडळाने दखल घेतलेली नाही. महिन्याभरात संबंधित कंपनीने नादुरुस्त मशिन बदलून दिली नाहीत, तर आम्ही महाराष्ट्र एसटी वर्कर्स कॉंग्रेस (इंटक) तर्फे राज्यव्यापी आंदोलन करू.

-मुकेश तिगोटे, राज्याध्यक्ष, महाराष्ट्र वर्कर्स कॉंग्रेस इंटक

इलेक्‍ट्रॉनिक्स मशिन वारंवार बिघडते ही बाब वाहकांसाठी डोकेदुखी आहे. अनेकदा कागदी रिळही वाहकांना स्वतःचे पैसे घालून बसवावे लागते. बंद पडलेले मशिन तत्काळ दुरुस्त करून मिळत नाही, तसेच बदलूनही मिळत नाही. एसटीच्या वरिष्‍ठ अधिकाऱ्यांनी तातडीने लक्ष घालून चांगली मशिन वाहकांना द्यावीत.

- उत्तम पाटील, पश्चिम महाराष्ट्र अध्यक्ष, महाराष्ट्र एसटी कर्मचारी संघटना.