Hasan Mushrif : 'कार्यकर्त्यांनो, कामाला लागा! मुश्रीफांच्या नेतृत्वात राष्ट्रवादीचे उमेदवार विजयी करु'; जिल्हाध्यक्षांचं आवाहन

कोल्हापूर : ‘जिल्ह्यातील ज्या तालुक्यात राष्ट्रवादीचे आमदार नाहीत अशा तालुक्यांत जिल्हा नियोजनमधून मोठ्या प्रमाणात निधी दिला जाणार आहे. त्यामुळे कार्यकर्ते आणि पदाधिकाऱ्यांनी कामाला लागावे’, अशा सूचना राष्ट्रवादीचे (अजित पवार गट) जिल्हाध्यक्ष ए. वाय. पाटील यांनी दिल्या.

बाजार समिती येथील राष्ट्रवादीच्या कार्यालयात ग्रामीण भागातील पदाधिकारी आणि कार्यकर्त्यांची बैठक झाली. पाटील म्हणाले, ‘पालकमंत्री हसन मुश्रीफ (Hasan Mushrif) यांच्या मार्गदर्शनाखाली जिल्ह्यात राष्ट्रवादी ताकदीने काम करत आहे. याचाच एक भाग म्हणून विधानसभेच्या पाच मतदारसंघांत राष्ट्रवादीचे उमेदवार विजयी करायचे आहे. त्यासाठी आतापासून नियोजन केले पाहिजे.

प्रभागनिहाय किंवा विधानसभा मतदारसंघनिहाय कमिट्या स्थापन केल्या जाणार आहेत. या कमिट्यांच्या माध्यमातून गावागावात कार्यरत राहिले पाहिजे.’ यावेळी आमदार राजेश पाटील, कार्याध्यक्ष अनिल साळोखे, भैय्या माने, संतोष पाटील, ‘गोकुळ’चे संचालक किसन चौगुले, रामाप्पा करिगार, पंडितराव केणे, यासिन मुजावर, अमित गाताडे, राजाराम धारवट, निहाल कलावंत, विकास पाटील, आप्पासाहेब धनवडे, जयसिंगराव देसाई आदी उपस्थित होते.