मुंबईहून राधानगरीत दाखल झालेल्या एकाच कुटुंबातील तिघांना कोरोनाची बाधा..

कसबा तारळे (कोल्हापूर) :मुळचे गुडाळ (ता. राधानगरी) येथील परंतु सध्या वास्तव्यास मुंबईत असलेल्या व गावाकडे येत असलेल्या एकाच कुटुंबातील तिघांना  कोरोनाची बाधा  झाल्याचे शुक्रवारी रात्री उशिरा  स्पष्ट झाले.

याबाबतची माहिती अशी:

नोकरीनिमित्ताने मुंबईत स्थायिक असलेले  पत्नी आणि 18 वर्षांच्या मुलासह खासगी ट्रॅव्हल्स बसने गावाकडे येत होते. गुरुवारी पहाटे मुदाळ तिठ्ठा येथे ते सर्वजण उतरले.गावी यायच्या तयारीत असताना त्यांचा माजी सरपंच अभिजीत पाटील यांच्याशी संपर्क झाला. त्यांनी या सर्वांना राधानगरी येथील कोवीड केंद्रात दाखल होवून तेथील वैद्यकीय पथकाचे मार्गदर्शन घेवूनच गावी या असे सांगितले. श्री पाटील यांच्या  सूचनेनुसार हे सर्वजण तेथून एका खासगी गाडीने थेट राधानगरी कोविड केंद्रात तपासणीसाठी गेले.

हेही वाचा- दुर्दैव ; त्या’ चिमुरड्याचे आठ सवंगडी कोरोनाने बाधित.... -

तेथे तिघांचेही  स्वॅब  घेऊन ते तपासणीसाठी कोल्हापूरला पाठवण्यात आले व या सर्वांना केंद्रातच दाखल करून घेतले.  शुक्रवारी रात्री उशिरा या तिघांचेही अहवाल पॉझिटिव्ह आले. असे असले तरी गुडाळ गावाशी त्यांचा संपर्क आलेला नाही. मात्र पिरळ येथील एका खासगी वाहनातून ते सर्वजण मुदाळतिठ्ठा येथून राधानगरीत पोहचल्याचे समजल्याने संबंधित वाहनचालकाचा प्रशासनाने शोध सुरू केला आहे. दरम्यान, त्याचा व त्याच्या थेट संपर्कात आलेल्यांचाही स्वॅब  तपासणीसाठी घेतला जाणार असल्याचे समजते.

संपादन - अर्चना बनगे