इचलकरंजी (कोल्हापूर) : शहराबरोबरच परिसरातील ग्रामीण भागात असणार्‍या परप्रांतीय कामगारांची सहनशीलता आता संपू लागली आहे. गेली दोन महिने काम नसल्यामुळे हतबल झालेले हे कामगार आज भडकले. तब्बल दिड हजारहून अधिक कामगार एकत्र येऊन इचलकरंजी-सांगली रस्त्यावरील पार्वती औद्योगिक वसाहतीसमोर आक्रोश आंदोलन केले. या आंदोलकांनी तब्बल 1 तास हा मार्ग रोखून धरला.
अखेर पोलिस प्रशासन आणि लोकप्रतिनिधींनी त्यांना मुळ गावी पाठविण्यासाठी तातडीने उपाययोजना करण्याचे आश्‍वासन दिले. त्यानंतर या कामगारांनी आपले आंदोलन मागे घेतले. दरम्यान आजच्या या घटनेने शहराबरोबरच ग्रामीण भागात हजारोंच्या संख्येने असलेल्या परप्रांतीय कामगारांतून नजीकच्या काळात उठाव होण्याची शक्यता निर्माण झाली आहे.
इचलकरंजीतील वस्त्रोद्योगाबरोबरच शहरालगत असलेल्या पार्वती औद्योगिक वसाहती, लक्ष्मी औद्योगिक वसाहत या ठिकाणी मोठ्या प्रमाणात परप्रांतीय कामगार आहेत. प्रशासनाकडे अर्ज करूनही जाण्यासाठी परवानगीच मिळत नसल्याने काही युवकांनी सायकलीने जाण्याचा प्रयत्न केला. आठवडाभरात तीनवेळा अशा युवकांना ताब्यात घेऊन पुन्हा परत पाठविण्यात आले. शहरात सुरू केलेल्या केंद्रात तब्बल 7 हजारहून अधिक नागरिकांनी आपल्या प्रांतात जाण्यासाठी अर्ज केले आहेत.
पार्वती औद्योगिक वसाहत या ठिकाणी मोठ्या संख्येने परप्रांतीय कामगार आहेत. आज या कामगारांची सहनशीलता संपून गेली. या औद्योगिक वसाहतीत आता कामगारांना अन्नही मिळेना अशी अवस्था झाल्याचे अनेक कामगारांनी सांगितले. हे सर्व कामगार एकत्र येऊन आज गजानन महाराज मंदिरसमोर आक्रोश आंदोलन सुरू केले. संतप्त झालेल्या कामगारांनी रस्ता रोखून धरला. याबाबतची माहिती मिळताच शहापूरचे पोलिस निरिक्षक प्रकाश निकम व श्री. यादव यांनी या कामगारांना बाजुच्या मोकळ्या जागेत नेण्याचा प्रयत्न केला.
मात्र कामगारांचा आक्रोश अधिकच वाढला. घटनास्थळी पोलिस उपाधिक्षक गणेश बिरादार, आमदार प्रकाश आवाडे, जिल्हा परिषद सदस्य राजवर्धन निंबाळकर, प्रसाद खोबरे, सहाय्यक कामगार आयुक्त अनिल गुरव, खोतवाडीचे सरपंच संजय चोपडे, तलाठी आर. जे. शेख यांनी कामगारांची समजूत काढली. श्री. गुरव यांनी येत्या चार दिवसात सर्व कामगारांना गावाकडे जाण्यासाठी व्यवस्था करण्याचे आश्‍वासन दिले. त्यानंतर आंदोलन मागे घेण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.