पालातील लोकांचे केले मोफत केशकर्तन, नेसरीतील व्यावसायिकाने जपली माणुसकी

नेसरी : कोरोनाच्या प्रादुर्भावामुळे सर्वांसमोरच अडचणी उभा राहिल्या आहेत. पण, स्वत:चा व्यवसाय अडचणीत असतानाही गरजूंना सहकार्य करणारे अवलिया समोर येत आहेत. येथील सुधाकर यादव त्यापैकीच एक. येथील दसरा चौक परिसरातील पालात राहणाऱ्या गरीब 22 नागरिकांचे त्यांनी मोफत केशकर्तन केले. यादव यांनी माणुसकीचे दर्शन घडविले. त्यांच्या सामाजिक कार्याचे कौतुक होत आहे. 

यादव यांचे रविवार पेठेत न्यू गोवा हेयर कटिंग नावाचे दुकान आहे. लॉकडाउन काळात सलून बंदच होते. दोन-तीन महिने सलून बंद असल्यामुळे अनेकांसमोर केस कटिंग करण्याबाबत अडचणी निर्माण झाल्या. काहींनी घरीच सोईनुसार केशकर्तन केले. मात्र, येथील दसरा चौकात पालात राहणाऱ्या नंदी बैल, देव वाले, पारधी समाजाच्या नागरीकांची अडचण झाली. पोटासाठी गावोगावी भटकंती करणाऱ्या या नागरिकांचा उदरनिर्वाह, भटकंती बंद झाली. पोटाच्या प्रश्‍नाबरोबरच आर्थिक चणचण भासत होती. 

पालातील नागरिकांची आर्थिक अडचण लक्षात घेऊन यादव यांनी या नागरीकांचे मोफत केशकर्तन करण्याचा निर्णय घेतला. लग्नाच्या वाढदिवसाचे औचित्य साधून पालात जाऊन मोफत केशकर्तन केले. पालातील नागरीकांनीही समाधान व्यक्त केले. अडचणीच्या काळात यादव यांनी दाखविलेल्या या माणुसकीचे कौतुक होत आहे. 

समाधान हाच माझा मोबदला
पालात राहणाऱ्या गरीब, गरजू, भटकंती करणाऱ्या लोकांसाठी अडचणीच्या काळात उपयोगी पडल्यामुळे माझ्या कलेचे चीज झाल्याचे वाटते. त्यांच्या चेहऱ्यावरील समाधान हाच माझा मोबदला असे समजतो. पैशापेक्षा मोफत कामाचे समाधान लाख मोलाचे आहे. 
- सुधाकर अशोक यादव, नेसरी

संपादन - सचिन चराटी