Kolhapur : तब्बल पाच हजारांहून अधिक ऊस उत्पादक शेतकऱ्यांची महामार्गावरच पडली पंगत; राजू शेट्टींनीही घेतलं पंगतीत बसून जेवण

कोल्हापूर : चक्काजाम आंदोलनाला चार तास उलटल्यानंतरही प्रशासन आणि कारखानदारांकडून प्रतिसाद दिला जात नव्हता. त्यामुळे दिल्लीत झालेल्या शेतकरी आंदोलनासारखा ठिय्या मारण्याच्या निर्धार आंदोलकांनी केला. त्यानंतर, बघता-बघता दुपारच्या जेवणासाठी परिसरातील ग्रामीण भागातून तांदूळ, डाळ, भाज्या, पिठासह तयार भाकरी येण्याचा ओघ सुरू झाला.

महामार्गाशेजारी मोकळ्या जागेत स्वयंपाक तयार करण्यात आला. त्यानंतर सायंकाळी पाच वाजता महामार्गावरच तब्बल पाच हजारांहून अधिक ऊस उत्पादक शेतकऱ्यांची पंगत बसली. माजी खासदार राजू शेट्टी यांनीही शेतकऱ्यांसोबत पंगतीत बसून जेवण घेतले. शिरोली पुलावर सुरू असलेल्या चक्का जाम आंदोलनामध्ये सायंकाळी सहा वाजेपर्यंत कोणताही निर्णय झाला नाही. त्यामुळे कार्यकर्त्यांनी रात्रीच्या जेवणाचीही तयारी केली.

या जेवणासाठी नांदणी, जांभळीसह परिसरातील ग्रामस्थांनी पुढाकार घेण्यास सुरुवात केली. आंदोलनाला जमलेल्या कार्यकर्ते आणि शेतकऱ्यांनीही जेवणाचे विविध पदार्थ स्वखर्चाने आणण्यास सुरुवात केली. जोपर्यंत निर्णय होत नाही तोपर्यंत रस्त्यावरून हटणार नाही, असा कार्यकर्त्यांनी निर्धार केला. शेतकऱ्यांची ही एकजुटीची चर्चा चांगलीच रंगली.