नाट्यमय घडामोडी; सा. रे. पाटील गटाचे सुभाष हेरवाडे सरपंचपदी बिनविरोध

कुरुंदवाड : शिरढोण (ता. शिरोळ) येथील सरपंच निवडीसाठी दिवसभर नाट्यमय घडामोडी झाल्या. सरपंच पदासाठी सतरापैकी तब्बल बारा सदस्यांनी अर्ज दाखल केल्याने चुरस निर्माण झाली; मात्र नाट्यपूर्ण घडामोडीनंतर अकरा जणांनी माघार घेतल्याने सा. रे. पाटील गटाचे बाबासो सुभाष हेरवाडे यांची बिनविरोध निवड झाली. निवडणूक निर्णय अधिकारी म्हणून मंडल अधिकारी दिलीप गायकवाड यांनी काम पाहिले. निवडीनंतर सत्ताधारी समर्थकांनी फटाक्यांची आतषबाजी व गुलालाची उधळण केली. सत्ताधारी बाणदार गटाला खिंडार पाडण्यात सा. रे. पाटील गटाची खेळी यशस्वी ठरली. सत्ता सा. रे. पाटील गटाकडे आली.

सरपंच चंद्रकांत चव्हाण यांनी राजीनामा दिल्याने रिक्त पदासाठी सतरापैकी तब्बल बारा सदस्यांनी अर्ज दाखल केले. मात्र सर्वच नाट्यपूर्ण घडामोडीनंतर ११ जणांनी माघार घेतल्याने सा. रे. पाटील गटाचे बाबासो हेरवाडे यांची बिनविरोध निवड झाली.

ग्रामपंचायतीत बाणदार गट, यड्रावकर आणि स्वाभिमानी संघटना एकत्र येऊन सत्ता स्थापन केली होती. सा. रे. पाटील गट विरोधात होता. आघाडीअंतर्गत कार्यकाल संपल्याने सरपंच चव्हाण यांनी राजीनामा दिल्याने रिक्त पदासाठी निवडणूक लागली होती. सा. रे. पाटील गटाने सावध भूमिका घेत सत्तेतून बाणदार गटाला बाजूला काढण्याची खेळी केली होती. सरपंचपदासाठी १२ सदस्यांनी अर्ज केला होता. माघारीच्या अंतिम क्षणी ११ जणांनी अर्ज माघार घेतल्याने श्री. हेरवाडे यांचा एकमेव अर्ज शिल्लक राहील्याने त्यांची निवड बिनविरोध झाल्याची घोषणा निवडणूक निर्णय अधिकारी गायकवाड यांनी केली.

चंद्रकांत चव्हाण, उपसरपंच रेश्मा चौधरी, शिवानंद कोरबू , संभाजी कोळी, आरिफ मुजावर, शक्ती पाटील, अनिता मोरडे, शर्मिला टाकवडे, ललिता जाधव, भारती मगदूम, संगीता मगदूम, तेजस्विनी पाटील, संगीता चौताळे, डी. आर. कांबळे, तलाठी रवी कांबळे, जब्बार नालबंद यांच्यासह सदस्य उपस्थित होते.

बाणदार यांना धक्का

ग्रामपंचायतीसह विविध संस्थांत बाणदार गटाचे नेते दस्तगीर बाणदार यांचा वरचष्मा आहे. तालुक्याच्या राजकारणात त्यांची भूमिका त्रासाची ठरल्याने आरोग्य राज्यमंत्री राजेंद्र पाटील व गणपतराव पाटील नाराजी होते. त्यामुळे दोन्ही नेत्यांनी सरपंच निवडीत बाणदार गटाला बाजूला ठेवण्याचा आदेश दिला होता. त्यामुळे नाराजीचा फायदा घेत सा. रे. पाटील गटाने बाजी मारली.