Raja Shirguppe : ज्‍येष्‍ठ साहित्यिक राजाभाऊ शिरगुप्पे यांचं कोल्हापुरात निधन; वयाच्या 64 व्यावर्षी घेतला अखेरचा श्वास

कोल्हापूर : ज्येष्‍ठ साहित्यिक-कार्यकर्ते प्रा. राजाभाऊ शिरगुप्पे (वय ६४) यांचं आज (मंगळवार) कोल्हापुरात नुकतंच निधन झालं. त्यांच्या निधनामुळं हळहळ व्यक्त होत आहे.

राजाभाऊंनी (Raja Shirguppe) साहित्यिक क्षेत्रात मोठं योगदान दिलं आहे. मूळचे निपाणीचे असलेले राजाभाऊ शिरगुप्पे हे गेली अनेक वर्षे आजऱ्यात वास्तव्यास होते. दोन महिन्यापासून त्यांची तब्येत बिघडल्यामुळं त्यांना कोल्हापुरातील रुग्णालयात दाखल करण्यात आलं होतं. राजाभाऊंनी कथा, कविता, नाटक, चित्रपट, पथनाट्य, समीक्षा लेखन आदी क्षेत्रांत आपली मोहर उमटवलीये. कर्नाटक-महाराष्ट्र सीमेवर असलेल्या निपाणीच्या तंबाखू कामगार चळवळीपासून ते समाजकारणात सक्रिय झाले.

शिवाय, विद्रोही सांस्कृतिक चळवळीसह प्रगतशील अशा विविध प्रकारच्या चळवळीत त्यांचा सक्रीय सहभाग होता. सांगलीत झालेल्या विद्रोही सांस्कृतिक चळवळीच्या संमेलनाचे ते अध्यक्ष होते. राजाभाऊंच्या मागे पत्नी प्रा. मीना शिरगुप्पे, चित्रकार मुलगा रोहन, मुलगी अनुजा, सून असा परिवार आहे. त्यांच्या निधनामुळे चळवळीची मोठी हानी झाल्याची भावना व्यक्त होताना दिसत आहे.