तरुणीने पंचगंगेत उडी मारताच घाबरलेल्या प्रियकराने क्षणाचाही विचार न करता थेट पाण्यात घेतली उडी

कोल्हापूर : प्रेम प्रकरणातून एका तरुणीने आज दुपारी शिवाजी पुलावरून थेट पंचगंगेत उडी घेतली. तिला वाचवण्यासाठी प्रियकरानेही पाण्यात उडी घेतली. नागरिकांच्या मदतीने तरुणीला त्याने सुखरूप बाहेर काढले. या मदत कार्यात शहर वाहतूक शाखेतील पोलीस कर्मचारी ही जखमी झाले.

याबाबत घटनास्थळ व पोलिसांकडून मिळालेली माहिती

गोकुळ शिरगाव परिसरातील एक तरुणी आणि पन्हाळा तालुक्यातील एक तरुण आज दुपारी मोटरसायकलजवळ शिवाजी पुलावर थांबले होते. त्यांच्यात दीर्घकाल चर्चा सुरू होती. त्यातच अचानक संबंधित तरुणीने थेट पुलावरून पंचगंगेत  उडी घेतली. घाबरलेल्या प्रियकराने क्षणाचाही विचार न करता तिला वाचवण्यासाठी पाठोपाठ थेट पाण्यात उडी घेतली.हा प्रकार पाहून परिसरातील नागरिकांनी ओरडा केला. याची माहिती मिळताच याठिकाणी बंदोबस्तासाठी असणारे शहर वाहतूक शाखेचे पोलीस कर्मचारी संदीप निळपणकर मदतीसाठी धावून गेले. घाटावरील पायर्‍यांवरुन ते खाली पडले. त्याला किरकोळ दुखापत झाली.

हेही वाचा- तमाम शेतकरी आणि कामगार वर्ग सरकारला नेस्तनाबूत केल्याशिवाय राहणार नाहीत: बाळासाहेब थोरात -

दरम्यान, संबंधीत तरुणीला प्रियकराने पाण्याबाहेर आणण्यास सुरुवात केली. त्यावेळेला त्याच्या मदतीला रणवीर नावाचा एक स्थानिक तरुण पोहत पाण्यात गेला. तसेच गणेश कुंडले, संदीप शेडबाळे, प्रशांत भाट, ऋषिकेश लवटे यांच्या मदतीने संबंधित तरुणीला सुखरूप पाण्याबाहेर काढण्यात आले. दोघेही सुखरूप असल्याचे पाहून सर्वांनी सुटकेचा निश्वास टाकला. त्यानंतर त्या दोघांना करवीर पोलिस ठाण्यात आणण्यात आले. येथे दोघांच्या नातेवाईकांना बोलून पुढील कारवाईची प्रक्रिया सुरू होती.

संपादन - अर्चना बनगे