इचलकरंजीत स्वभिमानी आक्रमक: चक्क महावितरण कार्यालयात सोडला साप

इचलकरंजी : शेतीसाठी दिवसात दहा तास वीजपुरवठा सुरू करावा या मागणीसाठी सर्व ठिकाणी स्वभिमानी शेतकरी संघटना (Swabhimani Shetkari Sanghatana) आक्रमक झाली आहे. दरम्यान, आज इचलकरंजीत (Ichalkaranji) शेतकऱ्यांनी महावितरण कार्यालयात चांगलाच गोंधळ घातला. कार्यकारी अभियंता प्रशांत राठी (Prashant Rathi) यांच्या टेबलवरच साप सोडत वीज पुरवठा देण्याची मागणी केली. महावितरणचा जोरदार निषेध करत घोषणाबाजी करण्यात आली. या प्रकारानंतर स्वाभिमानी शेतकरी संघटनेचे कार्यकर्ते चांगलेच आक्रमक झाले होते. कार्यालयात पोलिसही दाखल झाले.

शेतीला दिवसा वीज मिळावी या मागणीसाठी कोल्हापूरात महावितरणसमोर माजी खासदार राजू शेट्टी यांनी धरणे आंदोलन सुरू केले आहे. याकडे महावितरण दुर्लक्ष करत असल्याने रात्रीच्या वेळी पिकांना पाणी पाजताना येणाऱ्या अडचणी घेऊनच शहरात शेतकऱ्यानी महावितरण कार्यालयावर आज आंदोलन केले.

जोरजोरात घोषणा देत कार्यकारी अभियंता राठी यांना घेराव घातला. दिवसा दहा तास पाणीपुरवठा वीजपुरवठा देण्याची मागणी केली. रात्रीच्या वेळी पाणी पाजताना सापडलेला सापच त्यांच्या टेबलवर सोडला. या गंभीर प्रकारानंतर महावितरणचे कर्मचारी घाबरले. प्रश्नांचा भडीमार करत कार्यकारी अभियंता राठी यांना चांगलेच धारेवर धरले. जोपर्यंत वीजपुरवठा सुरू करण्याचे आश्वासन मिळत नाही तोपर्यंत या कार्यालयात बसून राहण्याचा निर्णय शेतकऱ्यांनी घेतला. पोलिसही कार्यालयात दाखल झाले.