कोल्हापुरात शिवसेनेच्या बॅनरवरून राजकीय चर्चांना उधाण; पहिल्यांदाच..

कोल्हापूर : राज्यात सत्तासंघर्ष सुरु असतानाच ठाकरे आणि शिंदे गटात अनेकांचा प्रवेश सुरु आहे. काही जण शिंदे गटाला पाठिंबा देत आहेत, तर काही जण ठाकरे गटाच्या पाठिशी असल्याचं म्हणत आहेत. एकनाथ शिंदे (Eknath Shinde) यांच्यासह 40 आमदारांनी बंड केल्यानंतर शिवसेना (Shiv Sena) दोन गटात विभागली गेली आहे. ही लढाई सुप्रीम कोर्टात सुरुय.

दरम्यान, शिवसेना पक्षप्रमुख उद्धव ठाकरे (Uddhav Thackeray) यांचे पुत्र तेजस ठाकरे (Tejas Thackeray) हे राजकारणात सक्रिय होणार अशी चर्चा गेल्या काही दिवसांपासून ऐकायला मिळत आहे. काही दिवसांपूर्वी शिवसेनेचे सचिव मिलिंद नार्वेकर यांनी तेजस यांच्या वाढदिवसानिमित्त दिलेल्या शुभेच्छांमुळं या चर्चेला अधिकच बळ मिळालं होतं. त्यानंतर आता तेजस ठाकरेंचा कोल्हापुरातील शिवसेनेच्या मेळाव्यात बॅनरवर नेत्यांसोबत तेजस ठाकरे यांचाही फोटो झळकल्यानं तेजस ठाकरे यांचा राजकारणात प्रवेश झाल्याची चर्चा सुरु आहे.

कोल्हापुरात शिवसेनेच्या ठाकरे गटाचा मेळावा

शिवसेनेच्या या बॅनरवर माजी मुख्यमंत्री उद्धव ठाकरेंचा मोठा फोटो आहे. तर, बॅनरच्या डाव्या बाजूने छत्रपती शिवाजी महाराज यांचा फोटो देण्यात आला आहे. नंतर दिवंगत बाळासाहेब ठाकरे, रश्मी ठाकरे आणि आदित्य ठाकरे यांचे फोटो आहे. शिवाय, आदित्य ठाकरेंच्या फोटोनंतर तेजस ठाकरे यांचा फोटो लावण्यात आला आहे. कोल्हापुरात नुकताच शिवसेनेच्या ठाकरे गटाचा मेळावा पार पडला. या मेळाव्यादरम्यान PIF संघटनेविरोधात ही बैठक घेण्यात आली. या कार्यक्रमात हिंदू आणि हिंदुत्वासाठी आता रस्त्यावर उतरण्याची वेळ शिवसेनेवर आली असल्याचं म्हणत शिंदे सरकारवर जोरदार टीका करण्यात आली.

शिवसेनेचा नवा चेहरा 'तेजस ठाकरे' असणार

विशेष म्हणजे, पहिल्यांदाच कोल्हापूरच्या मेळाव्यात शिवसेनेच्या बॅनरवर तेजस ठाकरे यांचा फोटो झळकत आहे. यावरून शिवसेनेचा नवा चेहरा तेजस ठाकरे हा असणार हे आता स्पष्ट होत चाललं आहे. मेळाव्यात शिवसेनेच्या वतीनं PIF संघटनेवर बंदी घालावी, अशी मागणी करण्यात आली. दसरा चौकातील छत्रपती राजश्री शाहू महाराज सभागृहात हा मेळावा घेण्यात आला. यावेळी जिल्हाप्रमुख संजय पवार, विजय देवणे, शहरप्रमुख सुनील मोदी, रविकिरण इंगवले यांच्यासह हर्षल सुर्वे, मंजित माने, स्मिता मांडरे सावंत उपस्थित होते.