‘चतुर्थश्रेणी कर्मचाऱ्यांची संख्या कमी केल्यास न्यायालयात धाव’

‘चतुर्थश्रेणी कर्मचाऱ्यांची संख्या
कमी केल्यास न्यायालयात धाव’
कोल्हापूर, ता. ३० ः महानगरपालिकेकडून शासनाकडे पाठवण्यात आलेला आकृतीबंध रद्द करून चतुर्थश्रेणीमध्ये काम करणाऱ्या कर्मचाऱ्यांची संख्या कमी करू नये. अन्यथा न्यायालयात जावे लागेल, असे निवेदन माजी नगरसेवक पांडुरंग आडसुळे यांनी मुख्यमंत्र्यांना पाठवले आहे.
निवेदनात म्हटले आहे, स्वच्छता, अग्निशमन दल, पाणीपुरवठा, दवाखाना यातील कर्मचारी महत्वाची कामे करतात. आकृतीबंधामध्ये त्यातील पदे कमी करण्याचा प्रयत्न आहे. यातून हद्दवाढीला विरोध करणाऱ्यांच्या हातात कोलीत दिल्यासारखे होईल. तसेच तृतीय, चतुर्थ श्रेणी कर्मचाऱ्यांची भरती भविष्यात बंद होण्याचे संकेत मिळत आहेत. खर्चात कपात करण्याच्या धोरणाचा फटका या कर्मचाऱ्यांना बसणार आहे. ज्या पदाचा अधिक पगार, संख्या जादा अशा अधिकाऱ्यांच्या जागा कमी होणे आवश्यक आहे. पण वरिष्ठ पदे सुरक्षित व जनतेच्या सुविधांची काळजी घेणाऱ्या कर्मचाऱ्यांची संख्या कमी होऊन नागरी सुविधांवर परिणाम होणार आहे. काही सेवांचे खाजगीकरण करण्याचा प्रयत्न असल्याचे यातून दिसून येत आहे. आकृतीबंधाच्या गोंडस नावाखाली सुरू असलेला प्रयत्न रोखला जावा. शासनाने विचार केला नाही तर नाईलाजास्तव न्यायालयात धाव घ्यावी लागेल.