निषेध बातमी

सतेज पाटील, महाडिकांनी माफी मागावी

संघटनांकडून निषेध ः आंबेडकरी चळवळीतील कार्यकर्त्यांची मागणी

कोल्हापूर, ता. १५ ः भारतरत्न डॉ. बाबासाहेब आंबेडकर यांच्या जयंतीनिमित्त बिंदू चौकात आयोजित कार्यक्रमात गोंधळ घालून डॉ. आंबेडकर यांचा अपमान करणाऱ्या माजी आमदार अमल महाडिक व आमदार सतेज पाटील यांचा आंबेडकरी चळवळीतील कार्यकर्त्यांनी निषेध केला. या दोघांनीही बिंदू चौकात येऊन माफी मागावी, असे आवाहन चळवळीतील कार्यकर्ते डॉ. अनिल माने यांनी केले आहे.
बिंदू चौक हा परिवर्तनवादी चौक म्हणून ओळखला जातो. याच परिसरात महात्मा जोतिबा फुले व डॉ. आंबेडकर यांचे पुतळे आहेत. डॉ. आंबेडकर यांचा या परिसरातील पुतळा हा जगातील पहिला आहे. पण राजाराम कारखान्याच्या निवडणुकीच्या निमित्ताने दोन्ही नेत्यांसह त्यांच्या कार्यकर्त्यांनी जयंतीचा कार्यक्रम सुरू असताना घातलेला गोंधळ निषेधार्ह आहे. त्यांनी यासाठी बिंदू चौकच का निवडला? आव्हान, प्रति- आव्हानासाठी जयंतीचा दिवस का निवडला ? कोल्हापूरचा सामाजिक सलोखा बिघडवण्याचा प्रयत्न काही शक्ती करत आहेत का ? असा सवालही या पत्रकात उपस्थित करण्यात आला आहे.
डॉ. बाबासाहेब आंबेडकर यांचा जगातील पहिला पुतळा असलेल्या, आंबेडकरी जनतेचे उर्जास्थळ, अस्‍मिता केंद्र असलेल्या बिंदू चौकाला राजकीय आखाडा बनवणाऱ्या अपप्रवत्तींचा रिपब्लिकन पार्टी ऑफ इंडियाने (आठवले गट) जाहीर निषेध केला आहे.
डॉ. आंबेडकर यांची जयंती जगभर मोठ्या उत्साहाने, आनंदात आणि वैचारिक पध्दतीने साजरी होत असताना शाहू महाराजांच्या पुरोगामी नगरीत एक घाणेरडी गोष्ट करण्याचा प्रयत्न इथल्या राजकारण्यांनी केला. राजाराम कारखन्याच्या निवडणुकीत कोण बाजी मारणार, या स्वप्नधुंदीत असणाऱ्या व स्वतःला पुरोगामी आणि महापुरूषांच्या विचारांचे वारसदार म्हणून घेणाऱ्या, स्वार्थासाठी महापुरूषांच्या विचाराचा जागर करण्याचा बहाणा करणाऱ्या नेत्यांनी एकमेकाला आव्हान देण्याचा बिंदू चौकात केलेला प्रकार निषेधार्ह असल्याचे या पत्रकात म्हटले आहे.
आंबेडकरी जनतेच्या भावनेशी खेळ करणाऱ्यांना सामाजिक, राजकीय जीवनातून हद्दपार करण्याचे सामर्थ्य आमच्या समाजात आहे ,याचेही भान ठेवायला हवे, असे या पत्रकात म्हटले आहे. पत्रकावर जिल्हाध्यक्ष उत्तम कांबळे, महाराष्ट्र संघटन सचिव प्रा. शहाजी कांबळे यांच्या सह्या आहेत.