विद्यार्थ्यांनी जाणून घेतली अकरावीची प्रवेश प्रक्रिया

विद्यार्थ्यांनी जाणून घेतली
अकरावीची प्रवेश प्रक्रिया

केंद्रीय समितीतर्फे उदबोधन वर्ग

कोल्हापूर, ता. ६ ः विद्यार्थी, पालकांनी मंगळवारी इयत्ता अकरावीच्या वाणिज्य इंग्रजी माध्यम आणि विज्ञान विद्याशाखेची प्रवेश प्रक्रिया जाणून घेतली. त्यांना केंद्रीय प्रवेश समितीतर्फे पेटाळा येथील गडकरी सभागृहात आयोजित विशेष उदबोधन वर्गाच्या माध्यमातून मार्गदर्शन करण्यात आले.
वर्गाच्या प्रारंभी प्राचार्य एस. एस. चव्हाण यांनी स्वागत केले. प्रा. राजेंद्र कोळेकर यांनी प्रास्ताविक केले. त्यांनी ऑनलाईन प्रवेश प्रक्रियेची माहिती दिली. सहाय्यक शिक्षण संचालक सुभाष चौगुले यांनी कोल्हापूर विभागीय शिक्षण उपसंचालक कार्यालयाच्या संकेतस्थळावर प्रवेश प्रक्रियेची माहिती उपलब्ध असल्याचे सांगितले. ऑनलाईन अर्ज भरताना विद्यार्थी, पालकांनी कोणती दक्षता घ्यायला पाहिजे याबाबत मार्गदर्शन केले. अर्जातील भाग एक आणि दोन भरण्याची माहिती प्रात्यक्षिकांसह देण्यात आली. इन हाऊस कोटा, व्यवस्थापन आणि अल्पसंख्यांक कोटा, विशेष आरक्षण, वैधानिक आरक्षण याबाबतची माहिती दिली. विद्यार्थी, पालकांच्या शंकांचे निरसन डॉ. गजानन खाडे आणि प्रा. एम. आर. नवले यांनी केले. यावेळी प्रा. मोहन जाधव, देवेंद्र भोसले, गणेश काटकर आदी उपस्थित होते.

चौकट
आतापर्यंत १४५५ विद्यार्थ्यांची नोंदणी
शहरातील विविध २८ महाविद्यालयांतील इयत्ता अकरावीच्या विज्ञान, वाणिज्य इंग्रजी माध्यमातील प्रवेशासाठी मंगळवारी सायंकाळी पाचवाजेपर्यंत एकूण १४५५ विद्यार्थ्यांनी नोंदणीची प्रक्रिया पूर्ण केली आहे. त्यांनी ऑनलाईन अर्जातील पहिला भाग भरला आहे.