Kolhapur Airport : कोल्हापूर विमानतळासाठी 28 कोटी 42 लाखांचा निधी; अतिरिक्त भूसंपादनाला मिळणार गती

कोल्हापूर : राज्यातील पाच विमानतळांच्या (Kolhapur Airport) विकासासाठी शासनाच्या वित्त विभागाने २१० कोटी रुपये निधी अर्थसंकल्पीय वितरण प्रणालीच्या माध्यमातून महाराष्ट्र विमानतळ विकास कंपनीस (Maharashtra Airport Development Company) वितरित केला आहे. त्यापैकी कोल्हापूर विमानतळासाठी २८ कोटी ४२ लाख रुपये वितरित झाला आहे. या निधी आता येथील अतिरिक्त भूसंपादनाच्या प्रक्रियेला गती मिळणार आहे.

या निधी वितरणाबाबतचा शासन आदेश आज सामान्य प्रशासन विभागाने काढला आहे. राज्यातील विमानतळांच्या विकासासाठी २०२३-२४ या आर्थिक वर्षासाठी तीनशे कोटींची तरतूद अर्थसंकल्पीत केली आहे. वित्त विभागाने मंजूर अर्थसंकल्पीय तरतुदीमधून २१० कोटी इतका निधी वितरित केला आहे. कोल्हापूर विमानतळ विकासासाठी यापूर्वी शासनाने २१२ कोटी २५ लाख रुपयांचा मंजूर केला आहे.

त्यातील २८ कोटी ४२ लाख रुपयांचा अखेरचा टप्पा आज वितरित करण्यात आला असल्याचे महाराष्ट्र विमानतळ विकास कंपनीचे अपर जिल्हाधिकारी दीपक नलवडे यांनी सांगितले. दरम्यान, कोल्हापूर विमानतळाच्या धावपट्टी विस्तारीकरणासाठी आणखी ६४ एकर इतक्या अतिरिक्त भू-संपादन केले जाणार आहे. त्यापैकी २१ एकरची प्रक्रिया पूर्ण झाली असून उर्वरित भू-संपादनाची अंतिम टप्प्यात आली आहे.

३१ मार्चपूर्वी निधी खर्चाची सूचना

ज्या विकासकामांसाठी निधी वितरित केला आहे. त्याच कामांसाठी तो ३१ मार्चपूर्वी खर्ची पडेल याची खबरदारी विमानतळ विकास कंपनीने घ्यावी, अशी सूचना शासनाने केली आहे.