रुपाली चाकणकरांचा अमोल कोल्हेंना थेट इशारा; म्हणाल्या, 'स्वत:च्या मतदारसंघात संपर्क नसलेला खासदार..'

कोल्हापूर : ‘आगामी लोकसभा निवडणुकीत राष्ट्रवादी कॉंग्रेस पक्षा (Ajit Pawar Group) ला मिळणाऱ्या जागांवर उपमुख्यमंत्री अजित पवार यांच्याकडून उमेदवार जाहीर केले जातील. त्यामुळे उमेदवार कोणीही असोत, या जागेवर स्वत: अजित पवार उभे आहेत, असे समजून कार्यकर्ते काम करतील’, असे राज्य महिला आयोगाच्या अध्यक्षा तथा राष्ट्रवादी कॉंग्रेस पक्षा (अजित पवार गट) च्या महिला प्रदेशाध्यक्षा रुपाली चाकणकर (Rupali Chakankar) यांनी प्रसिध्दीमाध्यमांशी बोलताना सांगितले.

तसेच ‘स्वत:च्या मतदारसंघात संपर्क नसलेल्या खासदार डॉ. अमोल कोल्हेंनी (Amol Kolhe) निवडणुकीसाठी माझ्याविरोधात विरोधकांकडे उमेदवार नाही, असे हास्यास्पद विधान करू नये’, असा टोलाही चाकणकर यांनी लगावला. जिल्हाधिकारी कार्यालयातील बैठकीनंतर त्यांनी प्रसिध्दीमाध्यमांशी संवाद साधला.

चाकणकर म्हणाल्या, ‘येणाऱ्या लोकसभा निवडणुकीत महायुतीला (Mahayuti) चांगले यश मिळेल, असा आत्मविश्‍वास आहे. त्याचे कारण म्हणजे उपमुख्यमंत्री अजित पवार यांनी केलेली विकासकामे व कार्यकर्त्यांना दिलेला न्याय होय. पवार यांनी समाजातील सर्व घटकांना न्याय देण्याचे काम केले आहे. दररोज होणारे पक्षप्रवेश पाहता विरेाधकांच्या पायाखालची वाळू सरकली आहे. त्यामुळे त्यांच्याकडून अजित पवार यांच्या निष्ठावंत कार्यकर्त्यांनी राजीनामे दिले, अशा अफवा पसरवित आहेत.’