Ichalkaranji Crime : श्वसननलिकेत फुगा अडकून इचलकरंजीत साडेतीन वर्षाच्या बालकाचा दुर्दैवी मृत्यू

इचलकरंजी : फुगा (Balloon) फुगवत असताना तो फुटून श्वासनलिकेत अडकून साडेतीन वर्षीय बालकाचा दुर्दैवी मृत्यू झाला. गौरांश अमित लगारे असे बालकाचे नाव आहे. घटनेची माहिती मिळताच नातेवाईक व परिसरातील नागरिकांनी आयजीएम रुग्णालयामध्ये मोठी गर्दी केली होती.

याबाबत मिळालेली माहिती अशी : लगारे कुटुंब अनेक वर्षांपासून गांधी कॅम्प, इचलकरंजी (Ichalkaranji) येथे वास्तव्यास आहे. मुलाचे वडील अमित लगारे यांचा खाद्यपदार्थ विक्रीचा व्यवसाय आहे. ते तीन महिन्यांपासून काजवे हॉस्पिटल परिसरात राहण्यास आले आहेत. गौरांश दुपारच्या सुमारास मित्रांसह फुगा फुगवत होता. तो फुगा फुटून श्वसननलिकेमध्ये गेल्याने तो बेशुद्ध पडला.

त्याला तातडीने नातेवाइकांनी तेथील एका खासगी रुग्णालयामध्ये दाखल केले; पण प्रकृती अत्यवस्थ झाल्यामुळे त्याला तातडीने इंदिरा गांधी सामान्य रुग्णालयामध्ये दाखल करण्यात आले. मात्र, उपचारापूर्वीच त्याचा मृत्यू झाल्याचे वैद्यकीय अधिकाऱ्‍यांनी सांगितले. या घटनेची नोंद करण्याचे काम उशिरापर्यंत शिवाजीनगर पोलिस ठाण्यात सुरू होते.