अतिक्रमण अकिवाट टाकळी

03379
अतिक्रमित गायरान शेतीक्षेत्र ताब्यात
सैनिक टाकळीत महसूलची कारवाई; पिके काढून घेण्याच्या सूचना
कुरुंदवाड ता. ३१ ः अकिवाट-सैनिक टाकळी (ता. शिरोळ) येथील १९२ एकरांतील अतिक्रमित गायरान शेतीचे क्षेत्र महसूल विभागाने आज जेसीबीने चर मारून ताब्यात घेतले. यापैकी सुमारे ६५ एकर क्षेत्र ऊस , टोमॅटो आणि मिरचीच्या पिकाखाली आहे. चार दिवसात क्षेत्रातील अतिक्रमण हटविण्यात येईल.
अकिवाट येथील गटक्रमांक ९२६ मध्ये १३० एकर गायरान जमीन आहे. महसूल प्रशासनाने जमीन ताब्यात घेताना ५० एकर जमिनीवर ऊस पिकाचे अतिक्रमण दिसून आले. संबंधित शेतकऱ्यांना महसूल प्रशासनाने पिके काढून घेण्यासंदर्भात सूचना केल्या होत्या. सध्या हे क्षेत्र खुले आहे.
आज (ता. ३१) सैनिक टाकळीतील गट क्र.१३५०,११९४ मधील ६५ एकर गायरान शेतीचे क्षेत्र तालुका नगर भूमापनचे अधिकारी ड्रोनद्वारे आणि अत्याधुनिक मोजणी यंत्राद्वारे मोजमाप करून त्यांनी हद्दी निश्चित करून दिल्या. यानंतर गायरान जमीन ताब्यात घेण्याची मोहीम सुरू केली. १५ एकर क्षेत्रावर ऊस आणि टोमॅटो पिके असून संबंधित शेतकऱ्यांना महसूल प्रशासनाने पिके दोन दिवसात काढून घेण्याच्या सूचना केल्या आहेत.
सैनिक टाकळी हद्दीतील गायरान हद्द निश्चित करताना नगरभूमापन अधिकाऱ्यांनी नोटीस दिलेली नाही. त्यामुळे भविष्यात आमचे क्षेत्र गायरान जमिनीत गेल्यास कोण जबाबदार, असा प्रश्न शेतकरी ज्ञानदेव पाटील (बाबर) यांनी गटविकास अधिकारी शंकर कवितके यांना केला. शासन वैयक्तिक शेतकऱ्याची एक इंचही जागा घेणार नाही. शेतकऱ्यांना शंका असल्यास त्यांनी मोजणीसाठी अर्ज करावा व शेताची मोजणी करून हद्दी निश्चित कराव्यात; असे सांगितले.