होम क्वारंटाइन असताना गिजवणेत तरुणाची आत्महत्या....

गडहिंग्लज - गिजवणे (ता.गडहिंग्लज) येथे होम क्वारंटाइन असलेल्या एका 27 वर्षीय तरुणाने आत्महत्या केल्याची घटना आज सकाळी उघडकीला आली. राहुल पाटील असे आत्महत्या केलेल्याचे नाव आहे.

राहुल हा बंगळूर येथील एका नामांकित कंपनीत नोकरीला होता. तो एम.टेक आहे. लॉकडाऊन असल्याने त्याचे वर्क फ्रॉम होम सुरू होते. तो 18 जुलै रोजी गावी आला. येताना त्याने शेंद्री माळवरील कोविड सेंटरला जाऊन तपासणी करून घेतली. कोणतीच लक्षणे नसल्याने त्याचा स्वॅब घेतला नाही. त्यानंतर त्याला गिजवणे येथील घरात क्वारंटाइन केले होते. काल मध्यरात्रीच्या सुमारास त्याने क्वारंटाइन असलेल्या खोलीतच गळफास घेऊन आत्महत्या केली.

मोठी बातमी : कोरोना लसीची मानवी चाचणी होणार 'या' जिल्ह्यात....

आज सकाळी ही घटना उघडकीला आली. राहुल हा एकुलता होता. वडील एस.टी मध्ये होते. त्यांचेही काही वर्षांपूर्वी निधन झाले आहे. राहुलच्या मागे आई, विवाहित बहीण व आजोबा असा परिवार आहे. आत्महत्येचे नेमके कारण समजू शकले नाही. पोलिसात या घटनेची नोंद करण्याची प्रक्रिया सुरू होती.ट

संपादन - मतीन शेख