सोलापूर एक्सप्रेस सुपरफास्ट तर महालक्ष्मी, सह्याद्रीच्या वेळेत बदल

मिरज - मध्य रेल्वेने अनेक गाड्यांच्या वेळापत्रकात आजपासून बदल जाहीर केला. सोलापूर - कोल्हापूर एक्स्प्रेस (क्रमांक 11051/11052) आता सुपरफास्ट म्हणून धावेल. तसेच कोल्हापुरातून सुटणाऱ्या कोयना, महालक्ष्मी, सह्याद्री या गाड्यांच्या वेळेत बदल करण्यात आला आहे.

सोलापूर एक्सप्रेसचा नवा क्रमांक 22133/22134 असा असेल. एक्सप्रेसचे रुपांतर सुपरफास्टमध्ये झाल्याने तिकिटदरही किंचीत वाढणार आहे. यापुर्वी आरक्षण केलेल्या प्रवाशांना प्रवासादरम्यान सुपरफास्टचे अतिरिक्त शुल्क तिकीट तपासणीसाकडे द्यावे लागेल.

हुबळी - लोकमान्य टिळक टर्मीनस ( कुर्ला ) ही गाडी 5 ऑक्टोबरपासून रद्द केली आहे. 29 एक्स्प्रेस गाड्यांचा वेगही वाढणार आहे. सोलापूर-कोल्हापूर प्रवासात 65 मिनिटे तर कोल्हापूर-सोलापूर प्रवासात 120 मिनिटांचा वेळ वाचेल. ही गाडी मध्यरात्री सव्वाएक वाजता मिरजेतून निघते, नव्य़ा वेळापत्रकानुसार अर्धा तास अगोदर म्हणजे 12.40 वाजताच निघेल. सोलापुरातून पहाटे 4 वाजता मिरजेत येते व कोल्हापुरकडे निघते. आता ती पहाटे 4.25 वाजता मिरजेतून निघेल. 

कोयना, सह्याद्री, महालक्ष्मी रेल्वेच्या वेळेत बदल

कोल्हापूर - मुंबई कोयना एक्स्प्रेस (क्रमांक 11030 ) कोल्हापुरातून सकाळी 7.55 ऐवजी 8.05 वाजता सुटेल. कोल्हापूर - मुंबई महालक्ष्मी एक्स्प्रेस ( क्रमांक 17412 ) सकाळी 7.25 ऐवजी 7.35 वाजता मुंबईत सीएसएमटीला पोहचणार आहे. कोल्हापूर - मुंबई सह्याद्री एक्स्प्रेस (क्रमांक 11024 ) सकाळी 11.50 ऐवजी दुपारी 12.05 वाजता सीएसएमटीला पोहोचेल.

सोलापूर - कोल्हापूर एक्स्प्रेस रात्री 11.35 ऐवजी 11.50 वाजता सोलापुरातून सुटेल. कोल्हापुरात सकाळी 6.20 ऐवजी 5.30 वाजता पोहोचेल. कोल्हापूर-सोलापूर एक्स्प्रेस (क्रमांक 22134) कोल्हापुरातून रात्री 11.55 वाजता सुटते़, त्याऐवजी आता 11.30 वाजता सुटेल. सोलापुरात सकाळी 7.35 ऐवजी पहाटे 5.10 वाजता पोहोचेल. बिदर-कोल्हापूर एक्स्प्रेस ( क्रमांक 11415 ) कोल्हापुरात रात्री 12.35 ऐवजी 12.25 वाजता पोहोचेल.
कोल्हापूर-बीदर एक्स्प्रेस ( क्रमांक 11416 ) कोल्हापुरातून रात्री 11.25 ऐवजी 11.55 वाजता सुटेल. पुद्दुचेरी-दादर एक्स्प्रेस ( क्रमांक 11006 ) रात्री 8.47 वाजता मिरजेतून निघते़ त्याऐवजी 8.50 वाजता निघेल. 

गाडी क्रमांक 11022 ही तिरुनेलवेली-दादर एक्स्प्रेस मिरजेतून रात्री 8.47 ऐवजी 8.50 वाजता रवाना होईल. म्हैसूर-दादर शरावती एक्स्प्रेस ( ्रमांक 11036 ) रात्री 8.47 ऐवजी 8.50 वाजता मिरजेतून निघेल. 

कुर्डुवाडी पॅसेंजर 6.25 वाजता
पहाटे 6 वाजता मिरजेतून सुटणारी कुर्डुवाडी पॅसेंजर आता 6.25 वाजता सुटेल. कोल्हापूर-पुणे पॅसेंजरने सकाळी सहा वाजता मोठ्या संख्येने प्रवाशी मिरजेत येतात व पंढरपूर-कुर्डुवाडीला जातात. त्यांच्या सोयीसाठी कुर्डुवाडी पॅसेंजर 25 मिनिटे उशिरा निघेल.