आता अवघड झाले....राज्यातील 93 लाख बेरोजगारांना मिळेना भत्ता

सोलापूर : सत्तेत आल्यास राज्यातील सुशिक्षित बेरोजगारांना प्रत्येक महिन्यात पाच हजारांचा भत्ता अन्‌ बळीराजाला कर्जमुक्‍त करण्याचे वचन शिवसेनेने दिले होते. तत्कालीन सरकारच्या सर्व्हेनुसार राज्यात 93 लाख सुशिक्षित बेरोजगार असून भत्ता देण्यासाठी प्रत्येक महिन्याला चार हजार 164 कोटी रुपये आवश्‍यक आहेत. तर सातबारा कोरा करण्यासाठी सुमारे एक लाख कोटीची गरज आहे. मात्र, राज्याची आर्थिक स्थिती बिकट असल्याने दोन्ही आश्‍वासने अर्धवटच आहेत. या पार्श्‍वभूमीवर तीन लाख 50 हजार कोटींची महसूल सूट केंद्राने द्यावी, असा प्रस्ताव राज्य सरकारने तयार केला आहे. 

हेही आवश्‍य वाचाच... धक्‍कादायक...'या' विद्यापीठाच्या सर्व्हर लॅबला ठोकले कुलूप 

अच्छे दिनचे स्वप्न दाखविताना मोदी सरकारने दरवर्षी दोन कोटी रोजगार निर्मितीचेही स्वप्न दाखविले. मात्र, 2014 च्या तुलनेत 2019 मध्ये बेरोजगारांची संख्या सुमारे 38 लाखांनी वाढली असून सोलापूर, नाशिक, नगर, औरंगाबाद, नागपूर, सांगली, कोल्हापूर व पुण्यात सर्वाधिक बेरोजगार असल्याचे सूत्रांनी सांगितले. कृषी क्षेत्रात दोन कोटी 80 लाख जणांना रोजगार उपलब्ध आहे. मात्र, बहुतांश सुशिक्षित बेरोजगार सरकारी नोकरीचीच प्रतीक्षा करीत आहेत. चार-पाच वर्षांपासून नव्याने शासकीय नोकरी भरती नाही, आर्थिक मंदीमुळे खासगी क्षेत्रातील घटलेले रोजगार, या पार्श्‍वभूमीवर नव्या सरकारच्या वचननाम्यानुसार पाच हजारांचा भत्ता मिळेल, अशी त्यांना आशा आहे. बहुतांश बेरोजगारांनी डांबरीकरण, शेती, टोल नाका यासह अन्य ठिकाणी कामाला सुरवात केली आहे. महापोर्टलच्या माध्यमातून होणारी मेगाभरतीही आता थांबल्याने त्यांच्यासमोर उदरनिर्वाहाचा प्रश्‍न निर्माण झाला आहे. या पार्श्‍वभूमीवर राज्य सरकारने केंद्र सरकारकडे मदतीचा हात पसरला आहे. केंद्राने राज्य सरकारला दोन वर्षांची महसूल सूट द्यावी, असा प्रस्ताव तयार केल्याची माहिती वित्त विभागातील वरिष्ठ अधिकाऱ्यांनी दिली. 

हेही आवश्‍य वाचाच...बेळगावला जाताय हेही माहिती असू द्या...लालपरीची वाहतूक बंद 

राज्यात 83 लाख सुशिक्षित बेरोजगार 
राज्यातील सुशिक्षित बेरोजगारांना प्रत्येक महिन्यात पाच हजारांचा भत्ता देण्याचे वचन शिवसेनेने निवडणुकीपूर्वी दिले. मात्र, मुख्यमंत्री उद्धव ठाकरे यांनी बेरोजगारांना बाजूला सारून सत्तेच्या माध्यमातून स्वत: रोजगार मिळवला. राज्यातील 83 लाख बेरोजगारांना भत्त्याची प्रतीक्षा असून मुख्यमंत्र्यांनी तो कधीपर्यंत मिळेल ते जाहीर करावे. 
- सुधीर मुनगुंटीवार, माजी अर्थमंत्री, महाराष्ट्र 

हेही आवश्‍य वाचाच...कसे जगायचे...पतसंस्थांमध्ये अडकल्या 957 कोटींच्या ठेवी 

राज्याची स्थिती 
सुशिक्षित बेरोजगार 
83.29 लाख 
भत्त्याची रक्‍कम (दरमहा) 
4,164 कोटी 
राज्याच्या डोक्‍यावरचे कर्ज 
सहा लाख 71 हजार कोटी 
केंद्राला महसूल सुटीचा प्रस्ताव 
तीन लाख 50 हजार कोटी