धक्‍कादायक...'या' विद्यापीठाच्या सर्व्हर लॅबला ठोकले कुलूप 

सोलापूर : पुण्यश्‍लोक अहिल्यादेवी होळकर सोलापूर विद्यापीठाच्या कुलगुरू डॉ. मृणालिनी फडणवीस यांच्या नावे परस्पर उघडलेल्या लॉगिन आयडीतून 15 नापास विद्यार्थ्यांना पास केल्याचे सत्यशोधन समितीने उघड केले. त्यात वाढ होण्याची शक्‍यता असल्याने परीक्षा विभागातील संगणकाची सर्व्हर लॅब सीलबंद केली आहे. राज्यपालांच्या आदेशानुसार पोलिसांत तक्रार नोंदवली असून पोलिसांच्या अहवालानुसार या प्रकाराची उच्चस्तरीय चौकशी पुण्यातील सायबर फॉरेन्सिक लॅबद्वारे केली जाणार आहे. 

कोणत्या विद्यार्थ्यांच्या उत्तरपत्रिका कोणत्या महाविद्यालयास तथा प्राध्यापकाकडे द्यायच्या, नापास विद्यार्थ्यांकडून प्रत्येक उत्तरपत्रिकेसाठी किमान 15 ते 25 हजार रुपये घेऊन पास करायचे, असे सोलापूर विद्यापीठातील प्रकार सातत्याने उजेडात आले. एमबीएच्या नापास विद्यार्थ्यांना गुण वाढविताना उत्तरपत्रिकेवर खाडाखोड न करताच एकूण बेरीज वाढवून पास करण्याची शक्‍कलही पाहायला मिळाली. आता चक्‍क कुलगुरू डॉ. फडणवीस यांच्या परस्पर लॉगिन आयडी तयार करून फार्मसीच्या नापास विद्यार्थ्यांना पास केल्याचे समोर आले आहे. परंतु, कुलगुरूंच्या परवानगीनेच लॉगिन आयडी तयार केल्याचे स्पष्टीकरण तत्कालीन परीक्षा नियंत्रक डॉ. कोकरे यांनी दिले आहे. आता हे प्रकरण राज्यपालांपर्यंत पोचले असून त्यांच्या सूचनेनुसार उच्चस्तरीय चौकशी केली जाणार आहे. 

हेही वाचाच...कसे जगायचे...पतसंस्थांमध्ये अडकल्या 957 कोटींच्या ठेवी 

ठळक बाबी... 

• सत्यशोधन समितीचा अहवाल राजभवनाला केला सादर 
• सोलापूर विद्यापीठातील परीक्षा विभागाच्या सर्व्हर लॅबला ठोकले कुलूप 
• नापास विद्यार्थ्यांना पास करण्यात मोठा आर्थिक व्यवहाराचा संशय 
• जानेवारी ते जून 2019 या कालावधीतील सीसीटीव्ही फुटेज पडताळणीचे निर्देश 
• तीन कर्मचाऱ्यांची परीक्षा विभागातून हकालपट्टी : एमकेसीएलचा प्रतिनिधी पुण्याला रवाना 
• कुलगुरूंच्या लॉगिन आयडीतून नापास विद्यार्थ्यांना पास केल्याप्रकरणी पोलिसांत गुन्हा दाखल 

हेही वाचाच...अवघड झाले...महाराष्ट्र एक्‍स्प्रेसचा स्लिपर कोच रद्द 

परीक्षा विभागाची सर्व्हर लॅब सीलबंद 
कुलगुरू डॉ. मृणालिनी फडणवीस यांच्या परस्पर तयार केलेल्या लॉगिन आयडीतून फार्मसीच्या नापास विद्यार्थ्यांना पास करण्याचा प्रकार उघड झाला आहे. त्यानुसार अज्ञात व्यक्‍तींवर पोलिसांत गुन्हा दाखल करण्यात आला आहे. तत्पूर्वी, सत्यशोधन समितीचा अहवाल राजभवनाला सादर केला असून आता परीक्षा विभागातील सर्व्हर लॅब सीलबंद करण्यात आली आहे. 
- डॉ. श्रेणिक शहा, परीक्षा नियंत्रक, सोलापूर विद्यापीठ