कोल्हापूर : बसस्थानकात प्रवेश नसल्याने इतर आगाराच्या बसेस निपाणीत राहिल्या थांबून

निपाणी : कर्नाटक-महाराष्ट्र महामंडळाच्या अनेक बैठका होऊनही आंतरराज्य बससेवेबाबत ठोस निर्णय न झाल्याने शासनाच्या नियमानुसार दोन्ही राज्यातील बससेवेस बुधवार (ता. 29) पासून प्रारंभ झाला आहे. महाराष्ट्र बसेस निपाणी बसस्थानकात न येता त्या महामार्गावरून थेट जात आहेत. तर कर्नाटक बससेना कोल्हापूर बसस्थानकात प्रवेश नसल्याने त्या तावडे हाॅटेलपासून सरळ मार्गस्थ होत आहेत. त्यामुळे सीमाभागातील प्रवाशांची गैरसोय कायम आहे.

कर्नाटक राज्य परिवहन महामंडळाला आंतरराज्य बससेवेबाबत हिरवा कंदील मिळाला असला तरी त्यांना आरटी-पीसीआर सक्तीचा केला आहे. निपाणी आगारातून कोल्हापूर (तावडे हाॅटेल), औरंगाबाद, चिपळूण, नाशिक, पुणे, मुंबई या मार्गावर बससेवा सुरु केली आहे. या मार्गावर निपाणीतून 12 बसेस धावत असून 28 चालक-वाहक सेवा बजावत आहेत. त्यामुळे प्रवाशांसह कामगारातून समाधान व्यक्त होत आहे. जिल्हाधिकारयांनी कोगनोळी टोलनाका ते तवंदी घाट या मार्गावर महाराष्ट्र बसमधील प्रवासी उतरण्यास व घेण्यास मनाई केली आहे. या टापूत महाराष्ट्र बसमध्ये प्रवाशांना प्रवेशही दिला जात नाही व उतरलेही जात नाही. त्यामुळे सीमाभागातील प्रवाशांची कोंडी होत आहे. कोल्हापूर विभागाच्या आजरा, चंदगड, गडहिंग्लज, नेसरी, कोवाड, सावंतवाडी, पणजी या मार्गावर बसेस सुरु आहेत.

`कोरोनाचा संसर्ग कमी झाला असला तरी जिल्हाधिकारयांनी कर्नाटकात बस सुरु करण्याबाबत अद्याप आदेश दिलेले नाहीत. त्यामुळे कर्नाटक हद्दीत प्रवाशांची चढ-उतार नसल्याने चंदगड, आजरा, गडहिंग्लज, उतूर, नेसरी, सावंतवाडी या मार्गावरी बसेस महामार्गावरून जात आहेत.`

-एस. बी. जाधव,

विभागीय नियंत्रणाधिकारी, कोल्हापूर

`कोल्हापूर बसस्थानक वगळता चिपळूण, बारामती, नाशिक, पुणे, मुंबई औरंगाबाद या भागात बससेवा सुरु केली आहे. त्याचा प्रवाशांना चांगला लाभ होत आहे. मात्र आरटी-पीसीआर सक्तीचे केले आहे.`

-मंजुनाथ हडपद,

आगार व्यवस्थापक, निपाणी