आष्टा येथे तलवारीने दहशत माजवणारा गजाआड

सांगली - आष्टा (ता. वाळवा) येथे तलवारीने दहशत माजवणाऱ्या एकास ‘गुंडा’विरोधी पथकाने गजाआड केले. उमेश जयपाल घस्ते (वय २५, साठेनगर, आष्टा) असे त्याचे नाव आहे. आष्टा येथील रत्नराज हॉटेलजवळ पथकाने सापळा रचून ही कारवाई केली. 

अधिक माहिती अशी, की अवैध हत्यारे घेऊन दहशत माजवणाऱ्यांवर कारवाई करण्याचे आदेश पोलिस अधीक्षक सुहैल शर्मा, अप्पर अधीक्षक शशिकांत बोराटे यांनी ‘गुंडा’विरोधी पथकास दिले आहे. त्यानुसार पथकाचे उपनिरीक्षक शरद माळी यांच्या 
नेतृत्वाखाली खास पथक तयरा करण्यात आले आहे. पथकातील पोलिस आष्टा परिसरात गस्तीवर होते.

आष्टा येथील रत्नराज हॉटेलजवळील माऊली पान शॉप समोरील  रस्त्यावर घस्ते हा तलवार घेऊन दहशत माजवत असल्याची  माहिती पथकास मिळाली. त्यानुसार पथकाने सापळा  राचून त्याला चौकशीसाठी ताब्यात घेतले. सखोल चौकशी केली असता त्याच्याकडे लोखंडी तलवार मिळून आली. घस्ते हा रेकॉर्डवरील गुन्हेगार आहे. त्याच्याविरोधात भारतीय हत्यार कायदा अधिनियमनुसार आष्टा पोलिस ठाण्यात गुन्हा दाखल करण्यात आला. कारवाईत सागर लवटे, वैभव पाटील, संतोष गळवे, संकेत कानडे, विमल काकडे, सुप्रिया साळुंखे, किरण खोते यांचा सहभाग होता.