लिफ्टच्या बहाण्याने तोंडाला लावायला रूमाल दिला अन्...

सांगली - शहरातील मध्यवर्ती बसस्थानक परिसरात भरदिवसा एका महिलेस लिफ्टच्या बहाण्याने महिलेची बोरमाळ आणि कर्णफुले असे दागिने पळविले. सकाळी दहाच्या सुमारास शास्त्री चौकात ही घटना घडली. याप्रकरणी दोघांविरोधात शहर पोलिस ठाण्यात गुन्हा दाखल केला. इंदुबाई शामराव पाटील (वय 65, रा. मर्दवाडी, आष्टा, वाळवा) यांनी फिर्याद दिली. 

याबाबत अधिक माहिती अशी, की इंदुबाई पाटील यांचे हरिपूर (ता. मिरज) माहेर आहे. त्या माहेरी सणासुदीला येतात. शुक्रवारी (ता. 20) त्यांचा भाचा महेश बापु तोडकर (रा. हरिपूर) यांच्या घरी धार्मिक कार्यक्रम होता. यासाठी त्यात सकाळी नऊच्या एसटीने आष्टा येथून निघाल्या. सकाळी दहाच्या सुमारास त्या सांगली बसस्थानक येथे पोहोचल्या. तेथून हरिपूर येथे जाण्यासाठी स्टॅंटमधून त्या बाहेर पडल्या. शास्त्री चौकात चालत जात असताना दोघे अज्ञात त्यांच्याजवळ आले. कुठे चाललाय, अशी विचारणा केली. त्यावेळी पाटील यांनी हरिपूर येथे चालल्याची सांगितले. स्टॉपवर सोडतो, असे त्या दोघांनी सांगून तोंडाला लावायला एक रूमाल दिला. त्यावेळीच त्याचे डोळे चुरचुरायला लागले. त्यातच दोघांनी त्यांच्या गळ्यातील एक तोळ्याची बोरमाळ व चार ग्रॅमचे कर्णफुले काढून घेतले. त्यानंतर त्या दोघांनी पळ काढला. 

हेही वाचा - तरुणीला पळवून नेणाऱ्या रोडरोमिओची धुलाई 

शहर पोलिस ठाण्यात फिर्याद

दरम्यान, पाटील यांनी त्यांचा भाचा तोडकर यांच्या घरी गेल्यानंतर त्यांनी सारी हकीकत सांगितली. चोरीचा प्रकार समोर आल्यानंतर शहर पोलिस ठाण्यात फिर्याद देण्यात आली. पोलिसांनी घटनास्थळी पंचनामा करून अज्ञात दोघांविरोधात गुन्हा दाखल केला. रेकॉर्डवरील गुन्हेगारांची माहिती काढण्याचे काम सुरू होते. 

हेही वाचा - सांगली जिल्हा परिषद अध्यक्षपदासाठी भाजपचा ‘K फॅक्‍टर’ 

पिवळा धातू... 

संशयित दोघांनी महिलेला तोंडाला लावण्यासाठी रूमाल दिला. त्यावेळी त्यांचे डोळे चुरचुरायला लागले. त्यावेळी त्यांनी एक पिवळ्या रंगाचा धातू असलेले बिस्कीट त्यांच्या हाती दिली. तेवढ्यात हातचालाखी करत दागिने लंपास करण्यात आले. नागरिकांना सावधगिरी बाळगण्याचे आवाहन पोलिसांनी केले आहे. 
...