सांगली : सांगलीवाडीत महाकाय गव्याचे दर्शन

सांगली : सांगलीवाडीतील (Sangaliwadi) बायपास रस्त्याच्या परिसरात शनिवारी रात्री महाकाय गव्याचे दर्शन झाले. कदमवाडीच्या दिशेने आलेला गवा कदमवाडीकडे जाणारा रस्ता ओलांडून नदीकाठी असलेल्या ऊसाच्या शेतात गेल्याची माहिती प्राणीमित्र विजय निकम यांच्याकडून मिळाली.

कोल्हापूर परिसरात शाहूवाडी भागात दोन गव्यांचा वावर, गव्याच्या हल्ल्यात तरुणाचा मृत्यू , अशा काही घटना ताजा असतानाच सांगली परिसरात गव्याचे आगमन झाले आहे. काही महिन्यांपूर्वी कसबे डिग्रजच्या शेतामळ्यात गवा आला होता. त्याच्या आगोदर सांगलीत विश्रामबागमध्ये रात्रीच्यावेळी गवा आला होता. गव्हर्मेंट कॉलनीतील रस्त्यावर अचानक महाकाय गवा दिसताच अनेकांची तारांबळ उडाली होती. त्यानंतर शनिवारी रात्री सांगलीवाडी परिसरात गवा दिसला आहे.

सांगलीवाडीतून कदमवाडीकडे जाणार्‍या रस्त्यावर रात्री सव्वानऊ वाजण्याच्या सुमारास गवा दिसला. बायपास रस्त्यालगत आपल्या घरासमोरुनच नवीन पुलाशेजारी असलेल्या ऊसाच्या शेतात गवा गेल्याचा दावा निकम यांनी केला आहे. गवा आल्याची माहिती मिळताच महापालिकेचे अग्निशमन दल त्या परिसरात दाखल झाले होते. गवा आल्याची माहिती वनविभाग आणि पोलिसांना देण्यात आल्याचेही सांगण्यात आले.