Sangli Gram Panchayat Election : सांगली जिल्ह्यात ८४ गावांत रणसंग्राम, दुपारपर्यंत ५३ टक्के मतदान

सांगली : जिल्ह्यातील ८४ ग्रामपंचायतींसाठी रणसंग्राम सुरु असून दुपारी दीडपर्यंत ५३ टक्के मतदान झाले होते. प्रचंड चुरशीने मतदान सुरू असून अधिकाधिक मतदारांना केंद्रापर्यंत आणण्यासाठी प्रयत्न सुरु आहेत. कुठेही अनुचित प्रकार घडल्याची माहिती समोर आलेली नाही.

मिरज तालुक्यातील हरिपूर ग्रामपंचायतीत अत्यंत चुरशीची लढाई सुरु आहे. तालुक्यात ५ ग्रामपंचायतींची निवडणूक होत असून पूर्व भागात ६३ टक्के तर पश्‍चिम भागात ५३ टक्के मतदानाची नोंद झाली आहे. तासगाव तालुक्यात २ गावांत निवडणूक असून ५९ टक्के, कवठेमहांकाळला १८ गावांसाठी ५२ टक्के, जतला ५ गावांसाठी ५२ टक्के,

खानापूरला ४ गावांसाठी ५२ टक्के, आटपाडीला १५ गावांसाठी ५५ टक्के, कडेगावला ३ गावांसाठी ३९ टक्के, पलूसला ४ गावांसाठी ५७ टक्के, वाळवा तालुक्यात ४ ग्रामपंचायती असून तीन ठिकाणी सरासरी ५४ टक्के तर अपर आष्टा परिसरात ५८ टक्के मतदान झाले आहे. शिराळ्यात सर्वाधिक ग्रामपंचायतींचा रणसंग्राम सुरु असून २४ गावांत सरासरी ५३ टक्के मतदान नोंदवले गेले आहे.

या रणसंग्रामात जिल्ह्याचे सर्वाधिक लक्ष कुंडल (ता. पलूस) आणि हरिपूर (ता. मिरज) या दोन गावांकडे लागले आहे. जिल्ह्यातील हा राजकीयदृष्ट्या अत्यंत संवेदनशील आणि विविध पक्षांचे प्रभावी गट असलेली ही गावे आहेत. तेथे पोलिसांचा कडेकोट बंदोबस्त तैनात आहे.

आता शेवटच्या टप्प्यात उर्वरीत मतदान बाहेर आणण्याचे आव्हान पेलण्यासाठी कार्यकर्त्यांची धावपळ सुरु झाली आहे. सकाळी पहिल्या टप्प्यात चांगले मतदान झाले आहे. दिवाळीची धामधुम नुकतीच सुरु झाली आहे. आता दिवाळीआधी फटाके कुणाचे उडतात, याचा निकाल सोमवारी (ता. ६) लागेल.