कोथळे मृत्युकांड प्रकरणी ‘मिनिट टू मिनिट’ रेकॉर्डवर - अधीक्षक पाठक

सांगली - पोलिस कोठडीतील अनिकेत कोथळेचा मृत्यू ते आंबोलीत मृतदेह जाळण्यापर्यंतच्या घटनाक्रमात कुणाचा कसा सहभाग होता, याचे क्षणाक्षणाचे बारकावे नोंदवले जात आहेत. आरोपींविरुद्ध हेच भक्कम पुरावे म्हणून वापरले जातील. त्यात कोणतीही हयगय केली जाणार नाही, अशी माहिती राज्य गुन्हे अन्वेषण विभागाचे (सीआयडीचे) अधीक्षक श्रीकांत पाठक यांनी पत्रकारांशी बोलताना दिली. 

अनिकेत कोथळेच्या मृत्यूचा तपास सीआयडीमार्फत सुरू आहे. या प्रकरणातील आरोपींची संख्या वाढण्याची शक्‍यता बळावली आहे. त्या पार्श्‍वभूमीवर सीआयडीच्या तपासालाही गती आली आहे. या प्रकरणातील मुख्य आरोपी तथा बडतर्फ पोलिस उपनिरीक्षक युवराज कामटे याने कोथळेच्या पलायनाची खोटी फिर्याद दिली होती. त्याचा स्वतंत्रपणे तपास केला जात असून तो आता सीआयडीमार्फत होणार आहे. गेल्या दोन दिवसांपासून पाठक यांनी या प्रकरणात अनेकांची उलटतपासणी घेतली आहे. 

या घटनाक्रमात एकेक नवीन चेहरे समोर येत आहेत. ही साखळी जुळवून त्याचा घटनाक्रम निश्‍चित करण्याचे आव्हान तपास अधिकाऱ्यांसमोर आहे. त्यासाठी प्रत्येक पुराव्याची आणि सहभागी आरोपांची स्वतंत्रपणे मांडणी करून पुरावे जुळवले जात आहेत. संबंधित व्यक्ती या गुन्ह्यात कशी व कुठल्या टप्प्यावर सहभागी झाली, त्याची भूमिका काय होती, याची रेघ अन्‌ रेघ सीआयडी जमा करत आहे. घटनेच्या रात्रीच्या कुणी कुणाला फोन केले, याचा सविस्तर अहवाल हाती आहे. संशयितांशी संपर्क केलेल्यांचे जवाब नोंदविले जात आहेत, असेही श्री. पाठक यांनी स्पष्ट केले. 

दोघे रडारवर
अनिकेत कोथळेसोबत चोरीच्या गुन्ह्यात अटक करण्यात आलेल्या अमोल भंडारे याला घटनेच्या दिवशी आयर्विन पुलावर घेऊन दोन व्यक्ती थांबल्या होत्या. कोथळेच्या मृतदेहाची विल्हेवाट लावण्याच्या प्रक्रियेत त्या दोघांचाही सहभाग होता, असे जवळपास स्पष्ट झाले आहे. ते दोघे कोण होते, यावरून लवकरच पडदा उठणार असल्याचे संकेत पोलिसांकडून मिळत आहे. पाठक यांनी मात्र यावर बोलणे टाळले.