Sangli News: विद्यार्थ्याने चार्जिंगवर धावणारी अफलातून सायकल बनविली

वांगी कडेगाव : येथील सुशांत दत्तात्रय मेटकरी या सोळा वर्षांच्या विद्यार्थ्याने चार्जिंगवर धावणारी अफलातून सायकल बनविली आहे. घरची आर्थिक परिस्थिती हलाखीची असल्याने स्वत: मजुरी करून पैसे जमवून सुशांतने उपजत कुशाग्र बुद्धिमत्तेच्या जोरावर केलेल्या या जुगाडाचे पंचक्रोशीतून कौतुक होत आहे.

- रवींद्र मोहिते

वडील दत्तात्रय मेटकरी आणि आई सुजाता दररोज मजुरीला गेल्याशिवाय चूल पेटत नाही. अजिबात शेतजमीन नाही. छप्परवजा घरात हे कुटुंब वास्तव्यास आहे. सुशांत हायस्कूलमध्ये नववीत शिकत असताना चार्जिंग सायकलची कल्पना त्याच्या डोक्यात आली. मात्र त्यासाठी आवश्यक पैसे स्वतः उभारण्याचा निर्धार केला.

दर शनिवार आणि रविवारी वडिलांसोबत कामाला जाऊन दहावीची परीक्षा देईपर्यंत त्याने ८ हजार रुपये मजुरीतून साठविले. दहावीनंतरच्या सुटीत त्याने या सायकलच्या जुगाड निर्मितीस सुरवात केली. इंटरनेटच्या मदतीने मध्य प्रदेशमधून साडेसहा हजार रुपये किमतीची २४ व्होल्टवर चालणारी छोटी इलेक्ट्रिक मोटर मागविली.

स्थानिक बाजारातून १२ व्होल्टच्या दोन बॕटऱ्या खरेदी केल्या. त्यासाठी एक हजार पाचशे रुपये खर्च झाले. सायकलच्या मागील चाकाशी या उपकरणांची जोडणी करून सांगड घातली आणि ही सायकल विनासायास धावू लागली.

सध्या तो गावापासून ५ किलोमीटर अंतरावर असलेल्या भारती विद्यापीठाच्या श्रीपतराव कदम महाविद्यालयात व्यवसाय प्रशिक्षणाच्या ११ वी वर्गात इलेक्ट्रिक शिकत आहे. ही बॕटरी एकदा तासभर चार्जिंग केल्यावर सायकल ५० किलोमीटर धावत आहे. सुशांत याच सायकलवरून जाऊन शिक्षण घेत आहे. सुशांतच्या या बुद्धिमत्तेचे अप्रुप होत असून त्याच्या पाठीवर आर्थिक शाबासकीची थाप पडण्याची गरज आहे.