लाॅकडाऊनमध्ये मिरची झाली तिखट; खिशाला फोडणी

पिंपोडे बुद्रुक (जि.सातारा) : कोरोना विषाणूच्या प्रादुर्भावामुळे मिरचीचे भाव दुपटीने कडाडले असून, सर्वसामान्यांच्या खिशाला फोडणी बसली आहे. गृहिणी वर्षभर पुरेल इतकी चटणी उन्हाळ्यात करून ठेवतात. रस्सा झणझणीत झाल्याशिवाय जेवणाला मजा येत नाही. त्यामुळे लाल मिरचीला मोठी मागणी असते. गेल्या वर्षी या कालावधीत मिरचीचे भाव 120 रुपये किलो होते. मात्र, कोरोनाच्या प्रादुर्भावामुळे मागणी अधिक आणि पुरवठा कमी होत असल्यामुळे यंदा मिरचीचे भाव मोठ्या प्रमाणात वाढले आहेत. आंध्र प्रदेश, कर्नाटक, तेलंगणा आणि मध्य प्रदेश या राज्यांमध्ये लाल मिरचीचे उत्पादन होते. मात्र, गेल्या वर्षी झालेल्या अतिवृष्टीचा परिणाम मिरची उत्पादनावर झाला असून, आवक कमी झाल्याने भविष्यात मिरची आणखी "तिखट' होण्याची शक्‍यता आहे. गेल्या वर्षी राज्यात अतिवृष्टीमुळे खरीप हंगामातील पिकांच्या नुकसानीबरोबरच मिरचीचे उत्पादन घटले आहे. 

बेडगी मिरचीची किंमत प्रतिकिलो 320 रुपयांपर्यंत पोचली आहे. त्या खालोखाल तेजा मिरचीचा दर 220 रुपये प्रतिकिलो झाला आहे. मसाला उत्पादकांकडेही माल शिल्लक नसल्यामुळे मसाल्यांच्या दरात प्रचंड वाढ झाली आहे. महागाईमुळे आहारात मिरचीचा तडका कमी झाला असून, स्वयंपाकात चटणीचा वापर जपून करण्याची पाळी गृहिणींवर आली आहे. वाहतूक व्यवस्था सुरळीत नसल्याने बाजारपेठेत लाल मिरचीची आवक घटली असून, आठवडाभरात भाव आणखी वाढतील, असे येथील किराणा व्यावसायिक संजय महाजन यांनी सांगितले. त्यामुळे स्वयंपाकात बेताने तिखट वापरण्याची कसरत महिलांना करावी लागत आहे. आहारातील रूचकरता वाढावी, यासाठी झणझणीत रस्सा केला जातो; परंतु मिरचीचे वाढते भाव थेट आहारावर परिणाम करीत असून, आहारातील तडक्‍यास फटका बसला आहे.

मिरचीशिवाय चटणी होत नाही आणि चटणीशिवाय स्वयंपाक कसा करणार? कोरोनाचे कारण पुढे करून मोठे व्यापारी मालाची साठेबाजी करत आहेत. सरकारचा कोणावरच अंकुश नसल्याने सर्वसामान्यांना झळ सोसावी लागत आहे.
- राजश्री कदम, गृहिणी, देऊर 

वाचन आवडीस प्रोत्साहन देणारा असाही व्हॉटस्‌ ऍप ग्रुप
 

हॅलाे...यांचे हे राेजचेच सुरु आहे...थकले आता मी...काय करु