सोलापुरातील कार्यकर्ते मुंबईत पोचले, पण...

सोलापूर : आमदार प्रणिती शिंदे यांचा मंत्रीमंडळ विस्तारात समावेश झाल्याची खात्री असल्याने सोलापूर शहर व परिसरातील शेकडो कार्यकर्ते मुंबईत पोचले, पण यादीत शिंदे यांचे नाव नसल्याने त्यांचा हिरमोड झाला आणि त्यांच्या उत्साहावर विरजण पडले. सोमवारी सकाळी नऊ वाजले तरी सर्वजण उदास स्थितीत विविध ठिकाणी थांबून होते.

हेही वाचा.. आदित्य ठाकरे यांना मिळणार कॅबिनेट 

....आणि उत्साह मावळला
आज सोमवारी होणाऱ्या मंत्रीमंडळ विस्तारात प्रणिती शिंदे यांना कॅबिनेट मंत्री म्हणून संधी मिळणार असल्याची चर्चा गेल्या तीन-चार दिवसांपासून सुरु होती. त्यामुळे कार्यकर्त्यांमध्येही उत्साह निर्माण झाला होता. नाव चर्चेत आल्यानंतर काहीजणांनी तातडीने मुंबईला जाण्याचे नियोजन केले. त्यानुसार अनेकजण काल रविवारी रात्रीच मुंबईकडे रवाना झाले. मात्र ते मुंबईत पोचल्यावर महाराष्ट्र प्रदेश कॅंाग्रेसने प्रसिद्ध केलेली यादी सोशल मिडीयावर त्यांना पहायला मिळाली आणि त्यांचा उत्साहच मावळला. 

हे आवर्जून वाचा.. काॅंग्रेसचे दहा मंत्री निश्चित

काहीजण परतीच्या प्रवासाला
मंत्रीमंडळाच्या यादीत प्रणिती शिंदे यांचे नाव नसल्याचे स्पष्ट झाल्याने मुंबईत गेलेल्या काही कार्यकर्त्यांनी लगेच परतीचा प्रवास सुरु केला आहे. शिंदे मंत्रीपदाची शपथ घेतानाच्या क्षणाचे साक्षीदार होण्यासाठी हे कार्यकर्ते मुंबईत पोचले होते. अखेरच्या क्षणी शिंदे यांचे नाव यादीत का नाही याबाबत त्यांच्यामध्ये तर्कवितर्क लढविले जात आहेत. 

पोलखोल... भाजपनेच दिला शिवसेनेच्या विरोधात बंडखोर उमेदवार

पदाधिकारी निघणार रात्री
शपथविधी सोहळ्यासाठी सोलापुरातून युवक कॅांग्रेसचे अध्यक्ष बाबा करगुळे, नगरसेवक विनोद भोसले, एनएसयुआयचे गणेश डोंगरे, महिला पदाधिकारी, त्यांच्यासमवेत 50 ते 60 कार्यकर्ते गेले आहेत. आता ते दिवसभर जीवाची मुंबई करून रात्रीच्या सिद्धेश्वर एक्स्प्रेसने सोलापूरकडे परतीच्या प्रवासाला निघणार आहेत.