सोलापूर : कोरोनापासून सुरक्षित राहण्यासाठी केंद्र सरकारच्या परवानगीने १२ वर्षांवरील सर्वांनाच प्रतिबंधित लस टोचली जात आहे. सोलापूर शहर-ग्रामीणमधील दोन लाख ३३ हजार मुलांनी (१२ ते १८ वयोगट) लसीचा पहिला डोस घेतला असून त्यापैकी ९३ हजार मुलांनी दोन्ही डोस घेतले आहेत. प्रतिबंधित लसीच्या दोन्ही डोसमुळे कोरोना विषाणूची तीव्रता कमी होते, हा अनुभव असल्याने १२ ते १८ वर्षांतील मुले लस टोचून कोरोनापासून सुरक्षित होत आहेत.
जिल्ह्यासाठी आतापर्यंत कोरोनावरील प्रतिबंधित कोविशिल्ड, कोवॅक्सिन, कोबॅव्हॅक्स लसीचे ५५ लाख १४ हजार ६५० डोस आले आहेत. त्यातील सध्या साडेतीन लाख डोस शिल्लक आहेत. तत्पूर्वी, जिल्ह्यातील १८ वर्षांवरील ३४ लाख १४ हजार ४०० तर १२ ते १७ वयोगटातील चार लाख ६९ हजार मुलांनी प्रतिबंधित लसीचे दोन्ही डोस घेणे अपेक्षित आहे. आतापर्यंत जिल्ह्यातील ३२ लाख २१ हजार २६ जणांनी पहिला तर २३ लाख ५४ हजार ६६३ जणांनी दुसरा डोस घेतला आहे. लसीकरणामुळे कोरोनाच्या पहिल्या व दुसऱ्या लाटेच्या तुलनेत तिसरी लाट अतिशय सौम्य स्वरुपाची राहिली. ऑक्सिजन, व्हेंटिलेटर, रेमडेसिव्हिर याची गरज रुग्णांना भासली नाही. त्यामुळे लसीकरणासाठी गर्दीही वाढली, पण कोरोनाची तीव्रता व संसर्ग कमी झाल्यानंतर अनेकांनी लसीकरणाकडे पाठ फिरविली. आता जगातील काही देशांमध्ये चौथी लाट आली आणि दिल्लीतही रुग्ण वाढत असल्याने लसीकरणासाठी पुन्हा प्रतिसाद मिळू लागला आहे. तरीपण, दोन्ही डोस घेऊन नऊ महिने पूर्ण झालेले तिसरा संरक्षित डोस घेत नाहीत, ही वस्तुस्थिती आहे. कोरोना कमी झाल्याने लस टोचून घेणाऱ्यांची संख्या कमी झाली आणि त्यामुळे लस वाया जाण्याचे प्रमाणही वाढू लागले आहे.
५० टक्के मुलांचे लसीकरण नाहीच
१२ ते १८ वयोगटातील चार लाख ६९ हजार मुलांनी प्रतिबंधित लस टोचणे अपेक्षित आहे. त्यापैकी दोन लाख ३३ हजार जणांनी पहिला तर ९३ हजार मुलांनी दोन्ही डोस घेतले आहेत. अजूनही जिल्ह्यातील दोन लाख ३९ हजार मुलांनी लसीचा एकही डोस घेतलेला नाही. जिल्ह्यात सध्या कोबॅव्हॅक्सचे एक लाख ४७ हजार तर कोवॅक्सिनचे ७७ हजार ३०० डोस शिल्लक आहेत. जिल्हाधिकाऱ्यांनी ही बाब गांभीर्याने घेऊन थंडावलेल्या लसीकरणाला गती देण्याच गरज व्यक्त केली जात आहे.
जिल्ह्याची सद्यस्थिती
लसीकरणाचे एकूण टार्गेट
३८,८३,३७८
पहिला डोस घेतलेले
३२,२१,०२६
दोन्ही डोस घेतलेले
२३,५४,६६३
बुस्टर डोस घेतलेले
४८,८६९
लसीचे शिल्लक डोस
३,५४,४८०
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
