आमदार प्रणिती शिंदे देणार विरोधकांना टक्कर! काँग्रेसचा विरोधक भाजप की राष्ट्रवादी? | Sakal
sakal

बोलून बातमी शोधा

प्रणिती शिंदे
आमदार प्रणिती शिंदे देणार विरोधकांना टक्कर! काँग्रेसचा विरोधक भाजप की राष्ट्रवादी?

आमदार प्रणिती शिंदे देणार विरोधकांना टक्कर! काँग्रेसचा विरोधक भाजप की राष्ट्रवादी?

सोलापूर : भाजपला सत्तेपासून रोखण्यासाठी शिवसेना, काँग्रेस, राष्ट्रवादीच्या राज्यपातळीवरील नेत्यांनी महाविकास आघाडीचा निर्णय घेतला आणि सरकार स्थापन केले. पण, पावणेतीन वर्षांनंतरही स्थानिक पातळीवर अजूनही पदाधिकारी, कार्यकर्त्यांचे मनोमिलन झाल्याचे दिसत नाही. दुसरीकडे काँग्रेसमधील अनेकजण पक्ष सोडून जात आहेत. शिवसेना, भाजपमध्ये नव्हे तर ते नाराज राष्ट्रवादीत प्रवेश करीत आहेत. त्यासाठी काही नेतेच फूस लावत असल्याची स्थिती आहे. शिवसेना शांत असून भाजपकडूनही तसे प्रयत्न होताना दिसत नाहीत. त्यामुळे काँग्रेसचा नेमका विरोधक भाजप की राष्ट्रवादी असा प्रश्न उपस्थित केला जात आहे. त्याला आमदार प्रणिती शिंदे कशापध्दतीने टक्कर देतील, याची उत्सुकता आहे.

हेही वाचा: महापालिका निवडणुकीसाठी महाआघाडीचा ४०: ४० :३३ फॉर्म्युला

ज्या सोलापूर जिल्ह्यातील सुशिलकुमार शिंदे यांनी राज्याचे नेतृत्व केले. देशात गृहमंत्र्यांपर्यंत झेप घेतली. त्या सोलापूर जिल्ह्यात काँग्रेसची दुरावस्था झाली आहे. शहर मध्य वगळता जिल्ह्यात काँग्रेसचा एकही आमदार नाही. महापालिकेत सत्तेवर असलेला काँग्रेस मागील निवडणुकीत तिसऱ्या क्रमांकावर गेला. जिल्ह्यातील पंचायत समिती, जिल्हा परिषदेतही काँग्रेसची पिछेहाट झाली. राष्ट्रवादीच्या मंत्र्यांचे राज्यभर दौरे वाढले असून शिवसेना मंत्रीदेखील जिल्हानिहाय दौरे करीत आहेत. या पार्श्वभूमीवर काँग्रेसला उर्जितावस्था आणण्यासाठी प्रदेशाध्यक्षांनी पक्षातील प्रत्येक मंत्र्यास एका जिल्ह्याची जबाबदारी दिली आहे. पण, मंत्री ती जबाबदारी पार पाडताना दिसत नाहीत. दुसरीकडे पालकमंत्र्यांकडून शिवसेना, काँग्रेसच्या पदाधिकाऱ्यांच्या तुलनेत राष्ट्रवादीत पक्षांतर करणाऱ्यास इच्छुक असलेल्यांसह स्वत:च्याच पक्षातील पदाधिकाऱ्यांना भरघोस निधी मिळत आहे. त्यामुळे काँग्रेसचे अनेक पदाधिकारी नाराज असून काहींनी पक्षही सोडण्याचीही तयारी केली आहे. तत्पूर्वी, माजी महापौर नलिनी चंदेले, माजी शहराध्यक्ष सुधीर खरटमल आणि आता माजी महापौर ॲड. यु. एन. बेरिया यांनी पक्ष सोडला आहे. दरम्यान, महापालिकेचा महापौर राष्ट्रवादीचा होण्यात काँग्रेसचाच प्रमुख अडथळा आहे. त्यामुळे नाराजांना आपलेसे करून काँग्रेसचे ‘हात’ कमकुवत करण्याचा प्रयत्न पालकमंत्र्यांच्या नेतृत्वाखाली काहीजण करीत असल्याची चर्चा आहे. त्यावर आता आमदार प्रणिती शिंदे यांची भूमिका काय असणार, याची उत्सुकता आहे.

हेही वाचा: वेतनावर राज्याचा दरवर्षी १.२३ लाख कोटींचा खर्च! शिक्षकांचा पगार ५२ हजार कोटींचा

‘ईडी’विरोधात बोलणाऱ्या जिल्ह्यातील एकमेव आमदार
जिल्ह्यातील भाजप, राष्ट्रवादी, काँग्रेसमधील आमदार, माजी मंत्री हे ‘ईडी’विरोधात बोलताना सावध भूमिका घेतात तथा बोलतच नाहीत. माढ्यातील आमदार बबनराव शिंदे व त्यांचे चिरंजीव रणजितसिंह यांचीही एका तक्रारीवरून ‘ईडी’ने त्यांचीही चौकशी केली. त्यानंतर ‘ईडी’विरोधात बोलून आपल्यामागे पिडा लागू नये म्हणून त्यापासून काहीजण चार हात लांबच राहत असल्याची चर्चा आहे. पण, आमदार प्रणिती शिंदे यांनी प्रत्येकवेळी ‘ईडी’च्या विरोधात असो वा पंतप्रधान नरेंद्र मोदींवर खरपूस टीका केली. त्यांचा परखडपणा, भाषणशैलीमुळे अनेकजण त्यांचे चाहते आहेत.

हेही वाचा: भोंग्यांसाठी परवानगीचे बंधन! ‘अशी’ असणार भोंग्यांची वेळ अन्‌ आवाजाची मर्यादा

महापालिकेसाठी प्रणितीताईच ब्रॅण्ड ॲम्बेसेडर
मोदी लाटेत काँग्रेस-राष्ट्रवादीची महापालिकेवरील सत्ता गेली. स्थानिक स्वराज्य संस्थांमध्येही पिछेहाट झाली. विधानसभेला अनेकांनी बंडखोरी केली तर काहींनी स्वतंत्रपणे उमेदवारी अर्ज भरले. तरीही, प्रणिती शिंदे यांनी विजयाची हॅट्रीक केलीच. अलिकडे कोल्हापुरकरांनीही त्यांच्या भाषणाची झलक अनुभवली. दरम्यान, भाजपने महापालिकेवर पुन्हा सत्ता मिळविण्यासाठी आमदार विजयकुमार देशमुखांवर जबाबदारी सोपविली असून निवडणूक काळात माजी मुख्यमंत्री देवेंद्र फडणवीसदेखील सोलापुरात तळ ठोकून असतील. त्याचवेळी राष्ट्रवादीचे नेते अजित पवार, जयंत पाटील यांच्यासह अनेकजण सोलापूर दौऱ्यावर येतील. पण, काँग्रेसकडून ‘ताई’च ब्रॅण्ड ॲम्बेसेडर म्हणून त्यांचा सामना करतील.

Web Title: Mla Praniti Shinde Will Give A Blow To The Opposition Is Bjp Or Ncp Opponent Of

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top