मोहोळ नगरपरिषद, माढा, माळशिरस नगर पंचायतीवर प्रशासकाची नियुक्ती !

सोलापूर : सोलापूर जिल्ह्यातील माढा (Madha) व माळशिरस (Malshiras) नगरपंचायत आणि मोहोळ (Mohol) नगरपरिषद येथील विद्यमान पदाधिकाऱ्यांची मुदत आज (शनिवार, ता. 8) पूर्ण झाली आहे. या तिन्ही ठिकाणी त्या - त्या तालुक्‍यातील प्रांत अधिकाऱ्यांची प्रशासक (Administrator) म्हणून नियुक्ती करण्यात आली आहे. (Appointment of Administrator on Mohol Municipal Council, Madha, Malshiras Nagar Panchayat)

याबाबतचा आदेश जिल्हाधिकारी मिलिंद शंभरकर यांनी काढला आहे. उद्यापासून (रविवार, ता. 9) मोहोळ नगरपरिषद, माढा व माळशिरस नगरपंचायत या ठिकाणी प्रांत अधिकारी प्रशासक म्हणून कामकाज पाहणार आहेत. या तिन्ही ठिकाणच्या निवडणुका होईपर्यंत आणि निवडणुकीच्या पहिल्या सभेपर्यंत प्रशासक म्हणून प्रांत अधिकारी काम पाहणार आहेत.

कोरोनाच्या पार्श्वभूमीवर आरोग्यविषयक आपत्कालीन परिस्थिती, लोकांचा सहभाग विचारात घेता संबंधित प्रशासकांनी व्यवस्थापनाच्या दृष्टीने अनौपचारिकरीत्या नगराध्यक्ष, उपनगराध्यक्ष, विषय समिती सभापती व गटनेते या पदाधिकाऱ्यांशी सल्लामसलत करावी. नगर परिषदेचे कामकाज सुयोग्य व लोकाभिमुख व्हावे या दृष्टिकोनातून मदत करण्यासाठी अनौपचारिक सल्लागार समिती असावी, तसेच करण्यात येत असलेल्या उपायोजना वेळोवेळी आवश्‍यकतेनुसार पदाधिकाऱ्यांना अवगत कराव्यात. कोरोना नियंत्रणाच्या अनुषंगाने पदाधिकाऱ्यांकडून सूचना मिळण्याच्या दृष्टीने प्रत्येक पंधरा दिवसांनी संबंधित पदाधिकाऱ्यांशी अनौपचारिक बैठक घ्यावी. ही बैठक व्हिडिओ कॉन्फरन्स व अन्य ऑनलाइनच्या माध्यमातून घेण्याबाबत प्रयत्न करावेत. बैठकीच्या वेळी मास्क तसेच आरोग्यविषयक सर्व दक्षता घ्यावी, अशा सूचनाही जिल्हाधिकारी मिलिंद शंभरकर यांनी केल्या आहेत.