माळशिरस येथे कोव्हिड सेंटर उभारण्यास नागरिकांचा विरोध; काय आहे कारण? वाचा सविस्तर... 

माळशिरस (सोलापूर) : येथील ग्रामीण रुग्णालयात कोरोनाच्या पार्श्वभूमीवर कोव्हिड सेंटर उभारण्याचा घाट काही शासकीय अधिकाऱ्यांनी घातला असल्याचे समजते. ग्रामीण रुग्णालंयाची इमारत सुसज्ज असून सर्व सुविधांनी युक्त आहे. सुसज्ज व हवेशीर इमारत हे या रुग्णालयाचे वैशिष्ट्य आहे. तहान लागल्यानंतर पाण्याचा शोध घ्यायचा, ही शासनाची परंपरा असल्याने ग्रामीण रुग्णालयाची स्वच्छ, सुसज्ज व हवेशीर इमारत पाहून याच इमारतीत कोव्हिड सेंटर उभे करावे, असे शासकीय अधिकाऱ्यांना मनोमन वाटत आहे. परंतु, या ग्रामीण रुग्णालयात कोव्हिड सेंटर उभे करण्यास नागरिकांच्या वतीने माळशिरस नगरपंचायतीचे माजी उपनगराध्यक्ष डॉ. अप्पासाहेब देशमुख व भाजपचे कार्यकर्ते बाळासाहेब सरगर यांनी विरोध केला आहे. 

हेही वाचा : विद्यार्थ्यांना शाळांचे तर शिक्षकांना बदल्यांचे टेन्शन... पालकांना मात्र वेगळेच टेन्शन..! 

येथे बाह्यरुग्णांची दररोज 200 ते 250 पर्यंत संख्या असते. या रुग्णालयात रुग्णांसाठी 24 तास अत्यावश्‍यक सेवा व 24 तास शवविच्छेदन करण्याची सुविधा उपलब्ध आहे. रुग्णांवर उपचार करण्याकरिता स्त्री-पुरुषांना स्वच्छतागृहासह स्वतंत्र कक्ष आहेत. या कक्षात ऑक्‍सिजनची सुविधा उपलब्ध आहे. श्वानदंश, सर्पदंश यासाठी आवश्‍यक असणाऱ्या इंजेक्‍शनची सुविधाही उपलब्ध आहे. एक्‍स-रे मशिन, टीबी रुग्णांची थुंकी तपासण्याची स्वतंत्र सोय, स्वतंत्र नेत्र तपासणी कक्ष असून या रुग्णालयात नेत्र तपासणी करून शस्त्रक्रियेसाठी परगावी पाठवण्याची सुविधा, कुटुंब नियोजन शस्त्रक्रिया, रक्त, लघवी, थुंकी तपासण्यासाठी स्वतंत्र प्रयोगशाळा, गरोदर मातांसाठी स्वतंत्र प्रसूती कक्ष, हिरकणी कक्ष, शवविच्छेदनासाठी स्वतंत्र कक्ष आदी सुविधा या रुग्णालयात उपलब्ध असून, त्या रुग्णांना मोफत दिल्या जातात. 

हेही वाचा : लॉकडाउनमध्ये "चिंचोळी'त 50 टक्के तर "या' एमआयडीसीत नगण्य उद्योग सुरू; टेक्‍स्टाईलची उलाढाल ठप्प ! काय आहे कारण? वाचा 

शासकीय अधिकाऱ्यांच्या कल्पनेनुसार या सुविधा रुग्णांना मिळण्याचे बंद झाल्या तर सर्वसामान्य रुग्णांचे हाल होणार आहेत. या सुविधांसाठी रुग्णांना जवळच्या शहरात भली मोठी फी देऊन उपचार घ्यावे लागणार आहेत. 
या शहरात शासनाच्या अनेक इमारती धूळखात पडल्या आहेत. त्यांचा उपयोग कोव्हिड सेंटरसाठी करावा व ग्रामीण रुग्णालयातील सुरू असलेले आरोग्यसेवेचे कार्य असेच चालू ठेवावे, अशी इच्छा येथील नागरिकांनी व्यक्त केली आहे. 

संपादन : श्रीनिवास दुध्याल