"यांना' नडला बैलगाडी शर्यतीचा शौक; दहाजणांविरुद्ध पोलिसांत गुन्हा 

माळशिरस (सोलापूर) : कोरोना विषाणूची टांगती तलवार डोक्‍यावर लटकत असताना तरंगफळ (ता. माळशिरस) येथील सिताडीच्या डोंगरात काही शौकिनांनी चोरून बैलगाडी शर्यतीचे नियोजन केले असल्याची माहिती पोलिस निरीक्षक व्ही. बी. गोल्डे यांना मिळाली. या माहितीनुसार पोलिसांनी प्रसंगावधान राखून शर्यतीच्या ठिकाणी धाव घेतली व शर्यत रोखली. या दहा शौकिनांवर पोलिसांनी गुन्हा दाखल केला आहे. 

हेही वाचा : ...तरच तुटेल पंढरपुरात कोरोनाची साखळी; टेस्ट वाढविण्याची गरज 

देशावर व राज्यातील सर्व जिल्ह्यांवर कोरोना विषाणूचे संकट घोंगावत आहे. दिवसेंदिवस रुग्णांची संख्या वाढत आहे. कोरोनाची साखळी तोडण्यासाठी पोलिस व जिल्हा प्रशासनामार्फत विविध उपाययोजना केल्या जात आहेत. अशा परिस्थितीत नागरिकांनी कोरोनाला अटकाव करण्यासाठी स्वयंशिस्त पाळत प्रशासनाने दिलेल्या नियमांच्या अधीन राहणे गरजेचे आहे. मात्र केंद्र शासनाने बैलगाडी शर्यतीला बंदी घातली असताना, काहींनी तरंगफळ येथील सिताडीच्या डोंगरात बैलगाडी शर्यतीचे आयोजन करून कोरोना संकटात भर घालण्याचा प्रयत्न केला. याबाबत माहिती मिळताच सहाय्यक पोलिस निरीक्षक शशिकांत शेळके, पोलिस हेड कॉन्स्टेबल अभिजित कुंभार, पोलिस हेड कॉन्स्टेबल संतोष भोसले, पोलिस नाईक प्रणय शिंदे, प्रवीण काळे, सुभाष पावरा यांच्या सहकार्याने ही शर्यत रोखण्यात आली. 

हेही वाचा : म्हणून "हा' पॅटर्न आला चर्चेत; आठ दिवसांत कोरोना रुग्णांच्या संख्येत घट 

शर्यतीच्या ठिकाणी पाच लाख रुपये किमतीचा पिकअप (एमएच 45 - एएफ 3064), 50 हजार रुपये किमतीचा शर्यतीचा एक बैल, चार हजार रुपये किमतीचे शर्यतीचे दोन बैल असा एकूण पाच लाख 54 हजारांचे शर्यतीचे साहित्य पोलिसांकडून ताब्यात घेण्यात आले आहे. तसेच बैलगाडी शर्यतीला केंद्र सरकारची परवानगी नसतानाही माळशिरस परिसरातील 8 ते 10 व्यक्तींनी बैलगाडी मालकाकडून पैसे स्वीकारून शासन निर्णयाचा भंग केला. कोरोनाचे संकट समोर असतानाही बैलगाडी शर्यत आयोजित केल्याप्रकरणी माळशिरस येथील पोलिस ठाण्यात 10 जणांवर गुन्हा दाखल करण्यात आला आहे. ही कारवाई पोलिस अधीक्षक मनोज पाटील, अप्पर पोलिस अधीक्षक अतुल झेंडे, उपविभागीय पोलिस अधिकारी नीरज राजगुरू यांच्या मार्गदर्शनाखाली करण्यात आली.