Solapur Crime : दोन चिमुरड्यांचा गळा घोटून आईची आत्महत्या; तोंडावर उशी दाबून खून केल्याचा संशय

सोलापूर : शहरातील राजस्व नगरातील एक महिला व दोन बालकांचा अकस्मात मृत्यू झाल्याची घटना गुरुवारी (ता. 4) घडली. याप्रकरणी मध्यरात्री उशिरापर्यंत सिव्हिल पोलिस (Civil Police) चौकीत नोंद करण्याचं काम सुरु होतं. या घटनेत महिलेनं रागाच्या भरात मुलांना मारून स्वतः आत्महत्या केली असावी, असा पोलिसांचा संशय आहे.

याबाबत अधिक माहिती अशी की, राजस्व नगरातील महिला ज्योती सुहास चव्हाण (वय 27) व तिची मुलं अथर्व (वय साडेतीन वर्षे) व आर्या (वय दोन वर्षे) ही बेशुद्ध अवस्थेत असल्याची माहिती पोलिसांना मिळाली.

पोलिस घटनास्थळी पोहचल्यानंतर तत्काळ त्यांना छत्रपती शिवाजी महाराज सर्वोपचार रुग्णालयात (Chhatrapati Shivaji Maharaj Hospital) आणण्यात आलं. त्यानंतर पोलिसांनी महिला व तिच्या दोन्ही मुलांची तपासणी करण्याचे पत्र वैद्यकीय अधिकाऱ्यांना दिलं.

गळ्यातील दागिने दुरुस्तीवरून वाद

दरम्यान, पोलिसांकडून मिळालेल्या माहितीनुसार, राजस्व नगरात राहणारे सुहास चव्हाण व त्यांची पत्नी ज्योती यांच्यात गळ्यातील दागिने कधी दुरुस्त करून आणता यावरून त्यांच्यात वाद झाला होता.

त्यानंतर सुहास हे नेहमीप्रमाणं कामावर निघून गेले. त्यानंतर मयत महिलेनं तिची मुलं आर्या व अथर्व यांना उशिनं तोंड दाबून मारलं. त्यानंतर घरात आतून कुलूप लावून स्वतः घरातच गळफास घेऊन आत्महत्या केली.

मयत महिला स्वभावानं तापट

टीव्हीचा आवाज वाढवलेला असल्याने मुलांचा आवाज कुणालाही ऐकू गेला नसावा. रात्री उशिरा सुहास हे कामावरून घरी परत आल्यावर हा प्रकार उघडकीस आला. त्यानंतर तत्काळ पोलिसांनी घटनास्थळी पाहणी करून तत्काळ मृतदेह छत्रपती शिवाजी महाराज सर्वोपचार रुग्णालयात तपासणीसाठी पाठवला.

रात्री उशिरापर्यंत याप्रकरणी गुन्हा दाखल झाला नव्हता. पण, मयत महिला ही स्वभावानं तापट असल्यानं हा प्रकार झाला असावा, असं स्थानिकांनी पोलिसांना सांगितलं. या प्रकारानं राजस्व नगरात हळहळ व्यक्त होत आहे.