Solapur : अग्निशमन दलाने वाचविली साडेपाच कोटींची मालमत्ता; सोलापूर शहरात वर्षभरात ३५५ ठिकाणी आगीची घटना

सोलापूर : महापालिकेच्या अग्निशमन दलाने २०२३-२४ या वर्षभरात महापालिका हद्दीतील एकूण ३५५ विविध ठिकाणी लागलेली आग आटोक्यात आणली तर महापालिका हद्दीबाहेरील १४ ठिकाणी लागलेली आग देखील आटोक्यात आणली.

महापालिका हद्दीतील व हद्दीबाहेरील अशी मिळून एकूण ३६९ ठिकाणी लागलेल्या आगीतील एकूण ५.५० कोटी रुपयांची मालमत्ता वाचवण्यात अग्निशमन दलाला यश मिळाले आहे. महापालिका हद्दीत लागलेल्या एकूण ३५५ ठिकाणी लागलेल्या आगीमध्ये जवळपास ९ कोटी २९ लाख ९०हजार रुपयांची मालमत्ता भस्मसात झाली.

वर्षभरात ३५५ ठिकाणी लागलेल्या आगीच्या घटनांमध्ये ४ कोटी ७५ लाख रुपयांची मालमत्ता वाचवण्यास अग्निशमन दलास यश मिळाले आहे. वर्षभरातील आग व अपघाताच्या घटनांमध्ये ११ जण जखमी तर ६ जण मृत्युमुखी पडले.

२०२३-२४ मध्ये महापालिका हद्दीत एकूण २२ अपघात ठिकाणी अग्निशमन दलाने मदतकार्य केले आहे, तर २२ ठिकाणी व्हीआयपी बंदोबस्ताच्या निमित्ताने आपली सेवा बजावली आहे. महापालिका हद्दीबाहेर लागलेल्या १४ विविध ठिकाणच्या आगीमध्ये जवळपास २ कोटी ४५ लाख रुपयांचे आर्थिक नुकसान झाले.

या १४ आगीच्या घटनांमध्ये ७५ लाख रुपयांचे साहित्य व मालमत्ता वाचवण्यास अग्निशमन दलाने यश प्राप्त केले आहे. सन २०२३-२४ वर्षात तीन अपघाताच्या ठिकाणी अग्निशमन दलाने मदत कार्य केले आहे.

महापालिका हद्दीबाहेरील वर्षभराच्या आग व अपघाताच्या ठिकाणी २ जणांचा मृत्यू तर ३ जण जखमी झाले आहेत. वर्षभरात अग्निशमन दलाने नऊ ठिकाणी व्हीआयपी बंदोबस्ताच्या निमित्ताने आपली सेवा बजावली आहे.