Osmanabad : आंदोलनाच्या निमित्ताने एकवटतोय ‘मराठा’

परंडा : मराठा समाजाचा आरक्षण महामोर्चा ८ नोव्हेंबर रोजी होणार आहे. त्यासाठीची तयारी शिस्तबद्ध सुरू आहे. मोर्चासाठी तालुका समन्वय समितीने दहा टिम कार्यरत केल्या असून प्रत्येक टिम मधील सदस्य प्रत्येक दिवशी एकाच वेळी दोन गावात जातात. ज्या गावी जायचे त्याची कल्पना दोन दिवस अगोदर ग्रामस्थांना दिली जाते.

प्रचार फेरीमध्ये कोणताही डामडौल सत्कार स्विकारला जात नाही. गावच्या सार्वजनिक ठिकाणी मंदिर, सभागृह येथे तरुण, वृद्ध, महिला, सर्व गावातील कार्यकर्ते एकत्र बसतात. कोण मोठा नाही, कोण छोटा नाही अशी भावना सर्वामध्ये असते. मराठा आरक्षण प्रचार समिती टीम ग्रामस्थांशी संवाद साधताना सकल मराठा समाज शेती, व्यवसाय, नोकरी या क्षेत्रातील समस्या आणि सुधारणा, मुलींचे शिक्षण, उपजीवेकेची साधने यावर चर्चा करत भावकी कलह, बांधावरील भांडणे आपल्या विकासात कशी अडसर ठरली हे समजावून सांगतात.

महिला शिक्षणात मागे पडल्या परंड्यात उच्च शिक्षण सोय नव्हती. दळण वळण साधने नव्हती. निजाम राजवट, मोगलाईच्या अधिपत्याखाली असणारा मराठा बांधव स्वांतत्र्यानंतर प्रथमच एकवटला जात आहे. प्रत्येक जण आत्मचिंतन करत आहे. मोर्चाला येताना कुठलाही अनुचित प्रकार घडू नये, याची जबाबदारी गावातील तरुण स्विकारत आहेत. स्वखर्चाने शिस्तबद्धरित्या परंडा जाण्याचे नियोजन सर्वजण करत आहे.

घरोघरी प्रचार दौरे घेण्यात पुरुषांबरोबर महिलाही आघाडीवर आहेत. गावोगावचे तरूण राजकारणात विस्कटलेली मन जोडण्यात गुतंले आहेत. याचा सकारात्मक परिणाम आगामी काळात दिसणार आहे. या मोर्चासाठी धाराशिव जिल्ह्यातील गावे तर सहभागी होणार आहेतच पण करमाळा, बार्शी, माढा, जामखेड इ शेजारील तालुक्यातील मराठा बांधव ही सहभागासाठी उत्सुक असल्याचे चित्र दिसत आहे.

सर्व जातीधर्माचे योगदान

सर्व जाती धर्माचे लोक या साठी योगदान देत आहेत. एकंदरीत ग्रामीण चळवळ विकासासाठी आसुसली असल्याचे चित्र निर्माण होत असुन महाराष्ट्रात चांगला संदेश जाणार असल्याचे सद्यस्थितीत वातावरण आहे.