सातबारा उताऱ्यावर लागले इतर व्यक्तीचे नाव

पंढरपूर(सोलापूर): जमिन विक्रीचे कोणतेही कायदेशीर खरेदी खत न करताच सातबारा उताऱ्यावर एका व्यक्तीचे नाव लावण्यात आले आहे. लॉकडाउन काळात घडलेला हा प्रकार लक्षात येताच संबंधित शेतकऱ्याच्या पायाखालची जमिनीच सरकली आहे. महसूल विभागाच्या या प्रतापामुळे अस्वस्थ झालेल्या गुंडगे कुटुंबाने न्यायासाठी प्रांताधिकाऱ्यांकडे धाव घेतली आहे. 

हेही वाचाः सिध्देश्‍वर मंदिर प्रवेशासाठी वंचितचे सोमवारी आंदोलन 

या प्रकरणी तत्काळ न्याय मिळावा, अन्यथा महसूल प्रशासनाच्या विरोधात कुुटुंबासह बेमुदत उपोषण करणार असल्याचा इशारा नारायचिंचोली (ता.पंढरपूर) येथील रविंद्र गुंडगे व त्यांच्या कुटुंबियाने दिला आहे. 

हेही वाचाः अकरा हजार पथविक्रेत्यापैकी 720 जणांनी मागितला प्रधानमंत्री स्व निधी योजनेचा लाभ 

नारायण चिंचोली येथे तुकाराम दासू गुंडगे यांच्या मालकीचे (गट नं.301-1-अ-1-अ-1) 12 गुंठे क्षेत्र होते. दरम्यान, तुकाराम गुंडगे यांचा डिसेंबर 2016 रोजी मृत्यू झाला. त्यानंतर रविंद्र, ज्ञानेश्वर, सचिन, दिपाली, राजाबाई तुकाराम गुंडगे, रुपाली विकास पाटील आदींची सातबारा उताऱ्यावर वारस हक्काने नावे दाखल झाली आहेत. दरम्यान, लॉकडाउन काळात संबंधित सातबारा उताऱ्यावर सोमनाथ लोहार या व्यक्तीचे नाव लागल्याचे लक्षात येताच गुंडगे या शेतकऱ्यानी तहसीलदारांकडे लेखी तक्रार दिली. या प्रकरणामध्ये मयत तुकाराम गुंडगे यांच्या वारस राजाबाई गुंडगे या जिवंत असताना त्यांचा मृत्यु झाल्याचेही नमूद केले आहे. याप्रकरणामध्ये महसूल विभागातील अधिकाऱ्यांना हाताशी धरुन चुकीच्या पध्दतीने सोमनाथ लोहार यांचे सातबारा उताऱ्यावर नाव लावल्याचा आरोप गुंडगे कुटुंबियाने केला आहे. 
या प्रकरणाची सखोल चौकशी करुन साताबारा उताऱ्यावरील बेकायदेशीरपणे लावण्यात आलेली सोमनाथ लोहार यांची नोंद रद्द करावी, अन्यथा महसूल प्रशासनाच्या अनागोंधी कारभाराविरोधात कुटुंबासह बेमुदत उपोषण केले जाईल, असा इशाराही तक्रारदार रविंद्र गुंडगे, ज्ञानेश्वर गुंडगे, दिपाली गुंडगे, सचिन गुंडगे, राजाबाई गुंडगे यांनी लेखी निवेदनाद्वारे दिला आहे. 

संपादनः प्रकाश सनपूरकर 

महाराष्ट्र