Bazar Samiti Result : पंढरपूर बाजार समितीवर भाजपच्या माजी आमदाराचं वर्चस्व; 18 उमेदवार विजयी

Pandharpur Bazar Samiti Election Results : गेल्या काही दिवसांपासून पंढरपूरचं राजकारण चर्चेत होतं, त्यामुळं इथं कोण बाजी मारणार याची उत्सुकता होती.

दरम्यान, पंढरपूर कृषी उत्पन्न बाजार समितीच्या निवडणुकीत (Pandharpur Market Committee Election) भाजपचे माजी आमदार प्रशांत परिचारक (Prashant Paricharak) गटाचे 18 उमेदवार विजयी झाले आहेत, त्यामुळं पंढरपूरचं परिचारकांचं वर्चस्व पुन्हा एकदा सिध्द झालं आहे.

पंढरपूरसह अकलूज, कुर्डुवाडी या तीन बाजार समितीच्या निवडणुकीसाठी आज (शनिवार) सकाळपासून मतमोजणी सुरू झाली. पंढरपुरातील बाजार समितीच्या 18 पैकी 5 जागा यापूर्वीच परिचारक गटानं बिनविरोध मिळविल्या होत्या.

दरम्यान, 13 जागांसाठी झालेल्या निवडणुकीची मतमोजणी पार पडली. पंढरपूरमधील कृषी उत्पन्न बाजार समितीच्या निवडणुकीमध्ये सत्ताधारी भाजपचे माजी आमदार प्रशांत परिचारक गटानं एक हाती सत्ता मिळवली. परिचारक गटानं 18 पैकी 18 जागा जिंकल्या आहेत.

येथील बाजार समितीवर परिचारक गटाची गटाची गेल्या 25 वर्षांपासून सत्ता आहे. आजच्या विजयानं परिचारक गटावर पुन्हा शेतकऱ्यांनी विश्वास दाखविल्याचं दिसून येतं. या निवडणुकीत विरोधी पाटील गटाचा दारूण पराभव‌ झाला आहे.