दोन्ही बायकांचा मुख्याध्यापक पतीला शॉक अन्‌ तो झाला पोलिस ठाण्यात लॉक!

कुर्डुवाडी (सोलापूर) : पहिले लग्न (Marriage) झालेले असताना मुलीच्या आई- वडिलांना फसवून दुसरे लग्न केल्या प्रकरणी मुख्याध्यापकास कुर्डुवाडी पोलिसांनी अटक केली आहे. बापूसाहेब बाबासाहेब आडसूळ (रा. अंकोली, ता. मोहोळ, सध्या रा. भोसरे, ता. माढा) असे अटक झालेल्या म्हैसगाव (ता. माढा) येथील एका माध्यमिक शाळेच्या मुख्याध्यापकाचे नाव आहे. याबाबत त्याच्या पहिल्या व दुसऱ्या पत्नीनेही त्या मुख्याध्यापका विरुद्ध दिलेल्या फिर्यादीनुसार कुर्डुवाडी पोलिस ठाण्यात (Kurduwadi Police Station) गुन्हे (Crime) दाखल करण्यात आले आहेत.

याबाबत कुर्डुवाडी पोलिसांनी दिलेली माहिती अशी की, पहिल्या पत्नीने दिलेल्या फिर्यादीनुसार बापूसाहेबाचे मोहोळ तालुक्‍यातील अंकोली येथे 13 मे 2012 रोजी पहिले म्हणजे फिर्यादीबरोबर लग्न झाले होते. त्यावेळी बापू हा विनाअनुदानित शाळेत कामाला होता. कॉम्प्युटर सेंटर व इतर कारणासाठी सारखा माहेरहून पैसे आण असे तगादा लावत होता. पती, सासरे, सासू, दीर, जाऊ, नणंद व नंदवा यांनी मूल होणार नाही या कारणावरून शारीरिक व मानसिक त्रास दिला. या सर्व गोष्टींना कंटाळून पहिली पत्नी जुलै 2018 साली माहेरी निघून गेली.

त्यानंतर पहिल्या पत्नीशी घटस्फोट झाला नसताना त्याने पहिले लग्न लपवून कोरोनाच्या साथीमुळे मोजक्‍या लोकांच्या उपस्थितीत परंडा तालुक्‍यातील वस्तीवर 30 मार्च 2021 रोजी दुसऱ्या मुलीबरोबर लग्न केले. बापूसाहेब, सासरे बाबासाहेब आडसूळ, सासू आवडाबाई आडसूळ, दीर अनिल आडसूळ, जाऊ दीपाली आडसूळ, नणंद सोनाली क्षीरसागर व लग्नासाठी मध्यस्थी करणारे चांगदेव कांबळे या सर्वांनी मिळून दुसऱ्या मुलीच्या आई- वडिलांना फसवून बापूसाहेबाचे दुसऱ्या फिर्यादीबरोबर लग्न केले आहे. फिर्यादीस वेळोवेळी मारहाण, शिवीगाळ व दमदाटी केली. गेल्या दोन महिन्यांपासून पोलिस बापूसाहेबाच्या शोधात होते. त्याला कुर्डुवाडी पोलिसांनी अटक केली असल्याची माहिती सहाय्यक पोलिस निरीक्षक विक्रांत बोधे यांनी दिली.