सोलापूर : प्राणीसंग्रहालयाच्या संचालक पदासाठी पुन्हा देव पाण्यात

सोलापूर : केंद्रीय प्राणीसंग्रहालय संचालयालयाने दाखवलेल्या त्रुटी दूर करण्याची महापलिकेची प्रक्रिया इतकी संथ गतीने आहे की प्राणीसंग्रलय पाहण्याची संधी आता नव्या पिढीलाच मिळेल असे चित्र दिसत आहे. दीड दोन वर्षांपासून सुरू असलेल्या या निवड प्रक्रियेत पाच वर्षाच्या अनुभवाच्या अटीमुळे योग्य उमेदवारच मिळत नसल्याचे समोर येत आहे.

केंद्रीय प्राणीसंग्रहालय संचालयालयाच्या निर्देशानुसार पूर्णवेळ प्राणी संग्रहालय संचालकाची नेमणूक करण्याची प्रक्रिया मागील एक वर्षापासून सुरू आहे. ऑगस्ट २०२१ पर्यंत तीन वेळी जाहिरात प्रसिद्ध करूनही संचालक पदासाठी प्रतिसाद न मिळाल्याने २४ जून रोजी महापालिकेने वाढीव मानधनासह संचालक व पशुवैद्यकीय अधिकारी पदाची जाहिरात प्रसिद्ध केली आहे. ऑगस्ट २०२१ मधील जाहिरातीमध्ये पाच वर्षांच्या अनुभवी संचालकपदासाठी तीस हजार रुपये मानधन देऊ केले होते. सध्याची महागाई लक्षात घेता इतक्या कमी मानधनावर प्राणीसंग्रहलायास संचालक मिळणे अशक्य असल्यचे वृत्त ‘सकाळ’ ने २८ ऑगस्ट २०२१ रोजी प्रसिद्ध केले होते. तत्पूर्वी तीन वेळी जाहिरात काढून महापालिकेने संचालकपद भरण्याचा प्रयत्न केला.