मे महिन्यात का जाणवणार रक्ताचा तुटवडा

सोलापूर : शहरातील सगळ्याच रक्तपेढ्यांत सध्या मुबलक रक्तसाठा आहे. महिनाभर पुरेल एवढा रक्तसाठा झाल्याने सगळ्याच रक्तपेढ्यांनी टप्प्याटप्प्याने रक्तदान शिबिरचे आयोजन करावे, असे आवाहन शिबिर आयोजकांना केले आहे. 

हेही वाचा : एकीकडे लगीनसराई दुसरीकडे लॉकडाऊन 

उन्हाळा आणि कोरोना पार्श्‍वभूमीवर फेब्रुवारी व मार्च महिन्यात रक्ताचा तुटवडा निर्माण झाला होता. त्यामुळे "सकाळ'ने सविस्तर वृत्त प्रसिद्ध केल्यानंतर शहरातील विविध सामाजिक संघटनांनी पुढाकार घेऊन रक्तदान शिबिराचे आयोजन केले. तसेच काही जणांनी वैयक्‍तिक रक्तपेढीत जाऊन रक्तदान केले. सध्या कोरोना व्हायरस पार्श्‍वभूमीवर "लॉकाडाउन' असल्याने शहरातील हॉस्पिटल बंद आहेत. रुग्णावरील शस्त्रक्रिया नंतर करणार असल्याने सध्या रक्ताची मागणी काही प्रमाणात कमी झाली आहे. शिबिरे मोठ्या प्रमाणावर आयोजित केल्याने सध्या सर्व रक्तपेढ्येंत मुबलक रक्‍तसाठा आहे. मात्र, मे महिन्यात तुटवडा जाणवणार आहे. त्यामुळे रक्तदान शिबिर आयोजकांनी सध्या टप्प्याटप्प्याने रक्तदान शिबिराचे आयोजन करावे. 

हेही वाचा : बिल न मिळाल्याने कंत्रादारांमध्ये असंतोष 

मे महिन्यात रक्ताचा तुटवडा जाणवतो 
सध्या रक्तपेढीत रक्तसाठा मुबलक आहे. मे महिन्यात रक्ताचा तुटवडा जाणवतो, तेव्हा आपल्याकडील रक्त शासनाच्या आदेशानुसार पुणे, मुंबईला पाठवावे लागते. तेव्हा आयोजकांनी रक्तदान शिबिरांचे आयोजन करावे. 
-नीलिमा कुलकर्णी, दमाणी रक्तपेढी, सोलापूर 

हॉस्पिटल बंद असून शस्त्रक्रिया नाहीत 
सध्या "लॉकडाउन'ने हॉस्पिटल बंद असून शस्त्रक्रिया होत नाहीत. त्यामुळे रक्ताची मागणी कमी झाली आहे. एक महिना पुरेल एवढाच रक्तसाठा सध्या आहे. 
- अजय जाधव, अक्षय रक्तपेढी, सोलापूर 

मे महिन्यात व्हावे शिबीराचे आयोजन 
सध्या पुरेसा रक्‍तसाठा असला तरी मे महिन्यात मात्र रक्ताचा तुटवडा जाणवणार असल्याने रक्तदात्यांनी पुढे येऊन शिबिर व रक्तदान करावे. 
-महम्मद म. रफीक, अतहर रक्तपेढी, सोलापूर