Solapur Crime News : माजी आमदारपुत्राची २५ लाखांची फसवणूक

सोलापूर : शिवाजी नगर बाळे येथील जमिनीच्या व्यवहारापोटी तिघांनी २५ लाख रुपये इसारा घेतला. परंतु, त्यांनी संगनमत करून भावासोबत सुरु असलेला न्यायालयीन वाद लपविला. जमिनीच्या व्यवहारापोटी दिलेली रक्कम त्यांनी परत न केल्याने माजी आमदारपुत्र राजेश सिद्रामप्पा पाटील यांनी सदर बझार पोलिसांत धाव घेतली आहे. त्यावरून तिघांविरुद्ध गुन्हा दाखल झाला आहे.

फिर्यादी राजेश पाटील (रा. सुदीप कॉम्प्लेक्स, होटगी रोड) यांचे सिद्धेश्वर एंटरप्रायझेस नावाचे फर्म आहे. त्याचे कार्यालय दक्षिण कसबा परिसरात असून फिर्यादीचा मित्र गुरूनाथ येलेटी यांच्या ओळखीतून सुभाष रंगनाथ लोहार, भूषण सुभाष लोहार व रत्नकुमार सुभाष लोहार (तिघेही रा. सोलापूर) यांची जमीन विक्रीसंदर्भात समजले.

बाळे शिवाजी नगर परिसरात लोहार यांची ११ हेक्टर ५७ आर (२८ एकर सात गुंठे) जमीन आहे. फिर्यादी राजेश पाटील व लोहार यांच्यात जमीन खरेदी-विक्रीचा व्यवहार ठरला. त्या जमिनीसाठी १२ कोटी रुपये देण्याचे ठरले. सुरवातीला इसारापोटी २५ लाख रुपये देण्याचे ठरले आणि सर्वांसमोर एक लाख आणि २४ लाख युनियन बॅंकेच्या धनादेशाद्वारे दिले.

परंतु, संशयित आरोपींचा भाऊ राजेंद्र लोहार यांच्यासोबत जमिनीवरून वाद सुरु आहे. तो वाद सध्या दिवाणी न्यायालयात दाखल असून त्याची माहिती तिघांनी लपवून पैसे घेतले, असेही फिर्यादीत नमूद आहे. वारंवार पैसे मागूनही २५ डिसेंबर २०२२ पासून त्यांनी घेतलेले पैसे परत केलेले नाहीत, असेही पाटील यांनी पोलिसांना सांगितले. पोलिस हवालदार श्री.औदुंबर आटुळे तपास करीत आहेत.