Solapur : एक पणती वंचितांच्या दारी!

सांगोला : एक पणती वंचितांच्या दारी या उपक्रमांतर्गत सांगोला येथील आपुलकी प्रतिष्ठानच्या वतीने शहराच्या लगत पालं टाकून राहणाऱ्या वंचितांना दिवाळीचा फराळ, सर्व लहान मुलांना नवे कपडे व इतर साहित्य देऊन या वंचितांची दिवाळी गोड करण्यात आली.दिवाळीच्या पहिल्या आंघोळीच्या पूर्वसंध्येला आपुलकी प्रतिष्ठानचे सदस्य व देणगीदारांच्या सहकार्यातून हा उपक्रम राबविण्यात आला.

सांगोला शहरातील वासुद रोड, मिरज रोड, स्मशानभूमी आदी भागात विविध छोट्या व्यवसायानिमित्त पालं टाकून आपला उदरनिर्वाह करणाऱ्या या वंचितांची दिवाळी साजरी करण्यासाठी आपुलकी प्रतिष्ठान गेल्या तीन वर्षापासून हा उपक्रम राबवत आहे.

वंचितांच्या पालावर जाऊन लहान मुलांना कपडे, महिला भगिनींना भाऊबीज भेट म्हणून साड्या व प्रत्येक कुटुंबाला दिवाळीचा फराळ, पणती, सुगंधी उटणे, साबण, सुगंधी तेल आदी साहित्य देऊन या वंचितांची दिवाळी गोड करण्याचा छोटासा प्रयत्न दरवर्षीप्रमाणे याहीवर्षी आपुलकी प्रतिष्ठानच्या वतीने राबवण्यात आला.

यावेळी प्रतिष्ठानचे अध्यक्ष राजेंद्र यादव, सचिव संतोष महिमकर, सहसचिव शरणप्पा हळळीसागर, डॉ. मच्छिंद्र सोनलकर, अरविंद केदार, प्रमोद दौंडे, सुरेशकाका चौगुले, अरविंद डोंबे, अच्युत फुले, वसंत सुपेकर, अमेय मस्के, भारत कदम, श्रवण महिमकर उपस्थित होते.

समाजातील प्रत्येक गरजू घटकापर्यंत पोहोचण्यासाठी आपुलकी प्रतिष्ठान नेहमीच प्रयत्नशील असते. सदर उपक्रमाचा सर्वे दिवाळीपूर्वी आठ दिवस आधी करण्यात आला. प्रत्येक कुटुंबाची माहिती घेऊन लहान मुलांना कपडे, त्याचबरोबर सर्व भगिनींना भाऊबीज भेट म्हणून साडी देण्याचा उपक्रम दरवर्षी राबविण्यात येतो. तो यापुढेही सर्वांच्या सहकार्यातून चालू राहिल.

- राजेंद्र यादव अध्यक्ष, आपुलकी प्रतिष्ठान, सांगोला.