Solapur Railway : सोलापूर रेल्वेला मांजरीत थांबा द्या,प्रवाशांची मागणी

मांजरी : येथील रेल्वेस्थानकावर बार्शी, सोलापूरकडे जाणारे प्रवासी दिवसेंदिवस वाढू लागले आहेत. मात्र, मांजरी रेल्वेस्थानकावर पुणे-सोलापूर गाडीला सकाळी थांबा दिला नसल्याने या प्रवाशांची मोठी गैरसोय होत आहे. त्यासाठी रेल्वे प्रशासनाने पुण्याहून सोलापुरकडे जाणाऱ्या गाडीला मांजरी स्थानकात थांबा द्यावा, अशी मागणी प्रवाशांनी केली आहे.

गेल्या काही वर्षात वाढलेले नागरिकरण, दैनंदिन प्रवास करणारे विद्यार्थी व नोकरदार तसेच विकसीत होत असलेले स्थानक यामुळे मांजरी परिसरातील रेल्वे प्रवाशांची संख्या दिवसेंदिवस मोठ्याप्रमाणात वाढत आहे. या भागात सोलापूर जिल्ह्याच्या विविध भागातील नागरिक मोठ्या प्रमाणात वास्तव्यास आहेत. शेती, व्यवसाय व इतर कामाच्या निमित्ताने अनेक नागरिक नियमित प्रवास करीत आहेत. मात्र, मांजरी स्थानकात सोलापूरला जाणारी गाडी थांबत नसल्याने येथील नागरिकांना सोलापूरकडे जाण्यासाठी लोणीकाळभोर स्थानकावर जावे लागते.

या मार्गावरून सोलापूर रेल्वे सकाळी पावणेनऊ व रात्री सव्वा अकराच्या सुमारास मांजरी स्थानकातून जातात. त्यातील सकाळी जाणाऱ्या गाडीला स्थानकात थांबा दिलेला नाही. तर, रात्रीच्या गाडीला थांबा दिलेला आहे. मात्र, रात्रीच्या गाडीला एकही प्रवासी येथे दिसत नाही. सकाळी मात्र सोलापूरला जाणारे अनेक प्रवासी तीकीट खिडकीवर चौकशीसाठी येत असतात. या प्रवाशांना बारामती गाडीने जाऊन लोणीकाळभोर येथे सोलापूर गाडी पकडावी लागते. यायध्ये वेळ व पैशाचा अपव्यय होऊन मोठा त्रासही सहन करावा लागत असल्याची तक्रार करीत प्रवासी उमेश मोरे, रामदास सावंत, अरुणा देशमुख, प्रकाश शिरसाठ, राजेंद्र फंड यांनी मांजरी स्थानकावर सकाळच्या गाडीला थांबा देण्याची मागणी केली आहे.

याबाबत रेल्वेच्या पुणे विभागाचे जनसंपर्क अधिकारी मनोज झंवर म्हणाले, "संबंधीत स्थानकावर येणारी प्रवासी संख्या, थांब्याची आवश्यकता व तांत्रिक बाबी याबाबत माहिती घेऊन वरिष्ठ अधिकाऱ्यांना दिली जाईल.