रुग्णांसाठी डॉक्‍टर देव बनून धावले ! वैरागात कोव्हिड सेंटर सुरू

वैराग (सोलापूर) : वैराग (ता. बार्शी) येथे वाढती कोरोनाबाधित रुग्णसंख्या पाहून व रुग्णांवर उपचारासाठी बेड व इतर सुविधा मिळत नसल्याची परिस्थिती पाहून रुग्णांसाठी डॉक्‍टर देव बनून धावले. कोरोनाच्या महामारीत "रुग्णसेवा हीच ईश्वर सेवा' हे ब्रीद घेऊन रुग्णसेवा करणाऱ्या वैरागच्या डॉक्‍टरांनी कोरोना रुग्णांसाठी पन्नास बेडचे "संतनाथ कोव्हिड डेडिकेटेड हेल्थ सेंटर' (हॉस्पिटल) सुरू केले आहे.

वैराग व परिसरातील कोरोना पॉझिटिव्ह रुग्णांच्या सोयीसाठी वैराग डॉक्‍टर असोसिएशन संचलित संतनाथ कोव्हिड डेडिकेटेड हेल्थ सेंटरची सुरवात येथील नकाते मंगल कार्यालय, मोहोळ रोड, वैराग येथे करण्यात आली आहे. जगावर जे कोरोनाचे संकट आले आहे, त्याच्या अनुषंगाने कोरोना बाधित रुग्णांची होणारी गैरसोय पाहता रुग्णांना हॉस्पिटलमध्ये बेड न मिळणे, इंजेक्‍शन न मिळणे या गैरसोयी पाहून वैरागमधील काही डॉक्‍टरांनी पुढे येऊन या कोव्हिड सेंटरची स्थापना केली आहे.

यात अत्यंत माफक दरात कोरोनाबाधित रुग्णांवर उपचार केले जाणार आहेत. या ठिकाणी 20 ऑक्‍सिजन बेडची सुविधा करण्यात आली असून, एकूण 50 बेडची व्यवस्था करण्यात आली आहे. डॉ. सुहास मोटे, डॉ. सचिन चव्हाण, डॉ. संताजी देशमुख, डॉ. आनंद गोवर्धन, डॉ. सचिन पाटील, डॉ. पवन गुंड, डॉ. श्रेयस शिंदे, डॉ. रविकिरण ढेंगळे, डॉ. रियाज तांबोळी आदींच्या पुढाकाराने हे कोव्हिड सेंटर सुरू करण्यात आले आहे.

या कोव्हिड सेंटरमध्ये पन्नास बेडसह दोन रक्त तपासणी प्रयोगशाळा, एक्‍स- रे टेक्‍निशियन, मेडिकल स्टोअर आदींचीही सोय करण्यात आली आहे. या सेंटरला प्रांताधिकारी हेमंत निकम, तहसीलदार सचिन शेरखाने, तालुका आरोग्य अधिकारी डॉ. अशोक ढगे यांचे सहकार्य लाभले आहे.

कोरोना कोणाला होऊ नये, पण झालाच तर रुग्णांनी घाबरून न जाता तत्काळ संतनाथ कोव्हिड डेडिकेटेड हेल्थ सेंटरशी संपर्क साधावा, असे आवाहन आरोग्य अधिकारी डॉ. अशोक ढगे यांनी केले आहे.